Azərbaycan Xarici İşlər Nazirliyinin mətbuat xidmətindən bildirmişlər ki, martın 9-da nazir Elmar Məmmədyarov iqamətgahı Moskva şəhərində yerləşən Qvatemalanın Azərbaycanda yeni təyin olunmuş səfiri Arturo Duarte ilə görüşmüşdür.
Etimadnaməsinin surətini nazirə təqdim edən A.Duarte Azərbaycanda səfir təyin olunmasından məmnunluğunu bildirmişdir. Ölkələrimiz arasında bir sıra sahələrdə əməkdaşlığın inkişaf etdirilməsi üçün geniş potensialın olduğunu vurğulayan diplomat Qvatemala-Azərbaycan əlaqələrinin genişləndirilməsi istiqamətində çalışacağını vurğulamışdır.
Nazir E. Məmmədyarov ölkəmizdə səfir təyin olunması münasibətilə A.Duarteni təbrik etmiş və işlərində müvəffəqiyyətlər arzulamışdır.