Yeni Azərbaycan Partiyası Nəsimi rayon təşkilatı respublikamızda oftalmologiya elminin inkişafına mühüm töhfələr vermiş, elmi-pedaqoji və ictimai fəaliyyəti ilə yeni həkimlər nəslinin yetişməsində müstəsna xidmətlərə malik olmuş, xeyirxah və humanist əməllərlə yaddaşlarda unudulmaz xatirələrlə qalmış akademik Zərifə xanım Əliyevanın anım və doğum günləri ilə əlaqədar silsilə tədbirlər keçirmişdir. YAP Nəsimi rayon təşkilatının sədri, Milli Məclisin deputatı Məlahət İbrahimqızı başda olmaqla bir qrup fəal sağlamlıq imkanları məhdud uşaqlar üçün 5 nömrəli Respublika Xüsusi İnternat Məktəbində olmuş, müəllim və şagird kollektivi ilə görüşmüşdür.

M.İbrahimqızı akademik Zərifə xanım Əliyevanın Azərbaycan tibb elminin beynəlxalq səviyyədə tanınmasında əvəzsiz xidmətlərindən, zəngin və mənalı ömür yolundan söhbət açaraq demişdir ki, o, yüksək vətəndaşlıq mövqeyi, həssaslığı, insanlara qayğı və diqqəti sayəsində xalqın dərin hörmət və sevgisini qazanmışdı. Əsil-nəcabətli ziyalı mühitində ərsəyə gələn Zərifə xanım qayğıkeş və mehriban ana kimi övladlarına da ən yüksək mənəvi keyfiyyətləri aşılamışdı.

Qeyd olunmuşdur ki, akademik Zərifə xanım Əliyeva yüksək səviyyəli peşəkar həkim kimi neçə-neçə insanın gözünə nur bəxş edib, xüsusi qayğıya ehtiyacı olan tənha insanlara, kimsəsiz və yetim uşaqlara həmişə böyük diqqətlə yanaşıb. Onun xatirəsini sadə xalqın yaddaşında ehtiramla yaşadan həm də bu mərhəmət və şəfqətdir.

Silsilə tədbirlər çərçivəsində YAP Nəsimi rayon təşkilatının fəalları qanvermə aksiyası keçirmişlər. Aksiya Azərbaycan Respublikası Səhiyyə Nazirliyinin Ə.Eyvazov adına Elmi Tədqiqat Hematologiya və Transfiziologiya İnstitutunda keçirilmişdir. Aksiyada 150 nəfərdən çox könüllü iştirak etmişdir.

Əliqismət BƏDƏLOV,
“Xalq qəzeti”