Kənd Təsərrüfatı Nazirliyi yanında Dövlət Fitosanitar Nəzarəti Xidməti pambıq əkinlərində nəticələrin yaxşılaşdırılmasını təmin etmək məqsədi ilə herbisidlərdən istifadə edilməsinin vacibliyini torpaq mülkiyyətçilərinin diqqətinə çatdırıb.       

Nazirliyin mətbuat xidmətinin yaydığı məlumatda deyilir ki, pambıq sahəsinin alaqlarla sirayətlənmə dərəcəsindən asılı olaraq xam pambığın məhsuldarlığı 20 faizdən çox azalır, onun keyfiyyəti aşağı düşür. Pambıq istehsalında əsas əmək tutumlu əməliyyatlardan biri alağa qarşı əllə və ya mexaniki mübarizədir ki, bu da məhsulun maya dəyərinin yüksəlməsinə səbəb olur.

Əkin sahələrində alaqlarla kimyəvi mübarizə aparıldıqda, məhsulun maya dəyəri aşağı düşür, pambığın lif keyfiyyəti yaxşılaşır, zərərverici və xəstəliklərlə sirayətlənməsi məhdudlaşır, gələcəkdə pambığın maşınla yığılmasına optimal zəmin yaranır.

Bütün bunları nəzərə alaraq herbisidlərdən istifadə qaydalarına ciddi riayət olunmalıdır. Pambıq əkinlərində herbisidlərin tətbiqi əsasən səpindən öncə, səpinlə birlikdə, cücərtilər çıxana 3 gün qalanadək və çıxışdan sonra aparılır.

Əlipənah BAYRAMOV,
"Xalq qəzeti”