Dövlət Sərhəd Xidmətinin (DSX) mətbuat mərkəzindən bildirmişlər ki, xidmətin əməkdaşları tərəfindən qeyri-leqal miqrasiyaya, narkotik vasitələrin qeyri-qanuni dövriyyəsinə, qaçaqmalçılığa və digər bu kimi cinayətlərə qarşı mübarizə tədbirləri davam etdirilmişdir.
Fevral ayı ərzində dövlət sərhədini pozduqları üçün 33 halda 55 nəfər saxlanılmışdır. Onların 38-i Azərbaycan, 2-si Gürcüstan, 1-i İran, 1-i Polşa vətəndaşıdır. Sərhəd pozucularının 13-ü qeyri-leqal miqrasiyaya qarşı mübarizə tədbirləri nəticəsində saxlanılmışdır. Qeyri-leqal miqrasiya etmək məqsədi ilə qanun pozanların 11 nəfəri Banqladeş, 2-si Moldova vətəndaşlarıdır.
Axtarışda olan 70 nəfər saxlanılaraq hüquq-mühafizə orqanlarına təhvil verilmişdir.
Narkotik vasitələrin qeyri-qanuni dövriyyəsinə qarşı mübarizə tədbirləri nəticəsində ay ərzində 11 halda 5 kiloqram 558,2 qram narkotik maddə aşkar edilərək götürülmüşdür.
Qaçaqmalçılıq fəaliyyətinə qarşı aparılan mübarizə tədbirləri nəticəsində 57 halda ümumi dəyəri təqribən 274 min 706 manat olan qaçaqmal, o cümlədən 1 tapança, 1 səs tapançası, 2 tüfəng, 2152 müxtəlif ölçülü patron, 3 ədəd tir tapançası, 13 tir tüfəngi, 2 avtomat darağı, 1 xəncər, 78 min 378 ABŞ dolları, 11 zinət əşyası, 113 mobil telefon, 263 mobil telefon aksessuarı, 1 qayıq, 46 min 700 metr tor, 30 baş iribuynuzlu heyvan, müxtəlif adda dərman preparatları, siqaretlər, spirtli içkilər, digər sənaye və ərzaq malları saxlanılmışdır.
Dövlət sərhədlərimizin etibarlı mühafizəsinin təşkili istiqamətində tədbirlər davam etdirilir.

AzərTAc