Azərbaycan Milli Elmlər Akademiyasının (AMEA) Yusif Məmmədəliyev adına Neft-Kimya Prosesləri İnstitutunda mikroskopik ölçüdə karbon boruların istehsalı texnologiyası işlənib hazırlanmışdır.
İnstitutun direktoru, akademik Musa Rüstəmovun, akademik Nadir Seyidovun və texnika elmləri doktoru Hikmət İbrahimovun bilavasitə rəhbərliyi ilə aparılmış elmi tədqiqatların nəticəsi olan yeni texnologiya yüksək dəqiqliyi ilə seçilən cihazların istehsalını intensivləşdirmək sahəsində yeni perspektivlər açır.
Akademik Musa Rüstəmov demişdir ki, yeni katalizatorun tətbiqi sahəsində respublikamızda ilk dəfədir ki, piroliz prosesinin maye məhsullarından kiçik ölçülü karbon boruların alınması mümkün olmuşdur. Nanotexnologiya sahəsində bu yeniliyin respublikamızda elektronika, informatika, habelə, kompyuter və kosmik cihazların, müasir rabitə vasitələrinin istehsalında geniş tətbiqi bu növ məhsullara istər daxili bazarda, istərsə də respublikamızdan kənarda tələbatı xeyli artıracaq, onların rəqabətə davamlılığını yüksəldəcək və böyük iqtisadi səmərə verəcəkdir.

AzərTAc