Əmlak Məsələləri Dövlət Komitəsi tərəfindən aprelin 17-də dövlət əmlakının özəlləşdirilməsi üzrə növbəti hərrac keçiriləcək. Bu dəfə hərraca müxtəlif çeşidli 90 dövlət əmlakı çıxarılacaq. Bunlardan 26-sı kiçik dövlət müəssisə və obyekti, 29-u istifadəsiz qeyri-yaşayış sahəsi, 35-i isə nəqliyyat vasitəsidir.

Hərraca çıxarılan kiçik dövlət müəssisəsi və obyektləri məişət, iaşə, qida, toxuculuq, təmir, sənaye, nəqliyyat və digər sahələrə aiddir. Bu əmlaklar paytaxtla yanaşı Gəncə, Sumqayıt, Cəlilabad, Mingəçevir, Goranboy, İsmayıllı və digər şəhər və rayonlarda yerləşir.

Prosesə çıxarılan kiçik dövlət müəssisəsi və obyektinin əksəriyyəti torpaq sahəsi ilə birlikdə özəlləşdiriləcək. Həm torpaq sahəsinin, həm də tikilinin ayrıca qiymətləndirilməsi aparılıb. Özəlləşdiriləcək müəssisələr sırasında Qusar Kərpic sexi, Astarada yerləşən "Azərbaycan" kinoteatrı, Şəmkir Balıq Zavodu kimi iri dövlət əmlakları var.

Hərraca müxtəlif markalı nəqliyyat vasitələri də çıxarılacaq. Özəlləşdiriləcək avtomobillər arasında Avropa istehsalı olan maşınlar üstünlük təşkil edir. Nəqliyyat vasitələrinin buraxılış tarixi 2008-2009-cu illəri əhatə edir. 

Əmlak Məsələləri Dövlət Komitəsi yerli və xarici investorları, sahibkarları, iş adamlarını və mülkiyyət sahibi olmaq istəyən hər bir kəsi özəlləşmədə fəal iştiraka dəvət edir.

        Əlipənah BAYRAMOV,
“Xalq qəzeti”