Türkiyənin nüfuzlu "Cümhuriyyət" qəzetində dərc olunmuş "Qafqazlarda sülh arayışı" başlıqlı məqalədə deyilir ki, Azərbaycan Prezidenti İlham Əliyev ölkəsinin torpaqlarının işğalına seyrçi qalmayacağını dəfələrlə və qətiyyətlə vurğulamışdır. Heç bir ölkə öz ərazisinin 20 faizinin başqaları tərəfindən işğal olunması ilə barışa bilməz.
Məqalədə bildirilir ki, erməni lobbisi Azərbaycan torpaqlarının işğalını və Xocalı qətliamını unutdurmaq üçün davamlı olaraq 1915-ci il hadisələrini gündəliyə gətirir. Onlar bununla on doqquz il əvvəl işğal edilən torpaqları, evlərindən didərgin saldıqları bir milyondan çox Azərbaycan türkünün dramını arxa plana keçirmək istəyirlər.
BMT, Avropa Şurası və Avropa Parlamentinin Dağlıq Qarabağ və ətraf rayonların işğaldan azad olunmasını tələb edən qərarlar qəbul etdikləri xatırladılan məqalədə vurğulanır ki, 1994-cü ildən fəaliyyət göstərən ATƏT-in Minsk qrupunun missiyası bu quruma üzv ölkələrin mənafelərinin toqquşması səbəbindən uğursuz olmuşdur. Digər tərəfdən, Ermənistan bu qərarlara etinasızlıq göstərməkdə davam edir. Lakin bir şey həqiqətdir ki, Dağlıq Qarabağ problemi həllini tapmayana qədər Cənubi Qafqazda sülhün bərqərar olması mümkün olmayacaqdır.

Oqtay BAYRAMOV AzərTAc-ın xüsusi müxbiri

Ankara