Bakı, 12 dekabr (AzərTAc). Dekabrın 12-də Azərbaycan Ağsaqqallar Şurası (AAŞ) ulu öndər Heydər Əliyevin vəfatının 6-cı ildönümü ilə əlaqədar anma mərasimi keçirmişdir.

Mərasimdə Şuranın sədri akademik Budaq Budaqov bildirmişdir ki, ümummilli lider Heydər Əliyevin vəfatının 6-cı ildönümündə xalqımız öz böyük oğlunun xatirəsini dərin hörmətlə yad edir, onun ruhu qarşısında baş əyir. Dahilər ona görə dahidirlər ki, onlar bütöv bir millət, bütöv bir dövlət üçün yaşayır, var olur, bütün həyatları boyu yalnız bu məqsədlə yaşayırlar. Ulu öndər tarixin və dünyanın üzünü Azərbaycana çevirdi. Onun məqsədyönlü siyasəti, uzaqgörənliyi, dühası nəticəsində dünya Azərbaycan adlı bir məmləkətin varlığından, onun sahib olduğu dəyərlərdən, düşmənlərinin azğın iddialarından xəbərdar oldu. Müstəqil Azərbaycan onun şah əsəridir. İndi bu şah əsər dünyanı təəccübləndirir, heyrətləndirir.
AAŞ sədrinin müavini professor Əli Həsənov, akademiklər Fuad Qasımzadə, Adilə Namazova, AAŞ icra aparatının rəhbəri Famil Gözəlov, Təbriz İstehsalçılar Birliyinin prezidenti Məhəmməd Zeydi və digərləri ulu öndər Heydər Əliyevin ömür yolunu, onun Azərbaycan dövlətinin formalaşması, dünya miqyasında tanınması sahəsində gördüyü misilsiz xidmətləri diqqətə çatdırmış, ümummilli lider ilə görüşlərindən söz açmış, bu dahi şəxsiyyət barədə xatirələrini danışmışlar.

Vurğulanmışdır ki, son illər ölkəmizdə görülmüş və müvəffəqiyyətlə davam etdirilən quruculuq işləri, respublikamızın hərtərəfli sosial-iqtisadi inkişafı, xalqımızın rifahının yüksəldilməsi istiqamətində həyata keçirilmiş genişmiqyaslı tədbirlər Heydər Əliyev şəxsiyyətinin unudulmaz xatirəsinə ən böyük ehtiramdır.