MDB İcraiyyə Komitəsindən verilən məlumata görə, martın 26-da Moskvada Birliyin üzvü olan ölkələrin Xarici İşlər Nazirləri Şurasının növbəti iclası keçiriləcəkdir.

İclasda 20-dək məsələ müzakirə olunacaqdır.

Nazirlər Böyük Vətən müharibəsində Qələbənin 65 illiyinə həsr olunmuş bir sıra sənədlərə münasibətlərini bildirəcəklər. Bundan əlavə, iclasda Qazaxıstanın ATƏT-də sədrliyi, Avropa Təhlükəsizliyi Müqaviləsi layihəsi, MDB çərçivəsində müxtəlif səviyyəli XİN-lərarası məsləhətləşmələrin keçirilməsi, Birliyin İnkişaf Konsepsiyası layihəsinin reallaşdırılması, korrupsiya ilə mübarizədə əməkdaşlıq, üzv ölkələrdə cari ildə keçiriləcək seçkilərdə qurumun müşahidəçilərinin iştirakı və digər məsələlər ətrafında fikir mübadiləsi aparılacaqdır.

Şuranın son iclası 2009-cu il oktyabrın 8-də Kişinyovda keçirilmişdir. Həmin iclasda MDB-nin üzvü olan ölkələrin xarici siyasət idarələrinin rəhbərləri bir sıra problemləri, o cümlədən 1941-1945-ci illər müharibəsində Qələbənin 65-ci ildönümünün bayram edilməsi məsələsini müzakirə etmişlər. İclasda, ümumiyyətlə 20-dək məsələ, o cümlədən sərhəd təhlükəsizliyinin təmin edilməsi, miqrasiya siyasəti, humanitar sahədə kollektiv qarşılıqlı fəaliyyətin inkişafına əlavə təkan verməli olan sənədlərin layihələri müzakirə olunmuşdur. 

AzərTAc