ABŞ Prezidenti Barak Obama parlament tətilindən istifadə edərək, Azərbaycan, Türkiyə, Suriya və Çexiyaya səfirləri təyin edib ("Assoşieyted Press").
B.Obama ABŞ-ın Azərbaycandakı səfiri vəzifəsinə Mətyu Brayzəni təyin edib. Təcrübəli diplomat imicinə malik olan M.Brayzə bir müddət əvvəl ATƏT-in Minsk Qrupunda amerikalı həmsədr kimi çalışıb.
Vaşinqtonu Suriyada Robert Ford, Türkiyədə - Frensis Riççiardo, Çexiyada - Norman Eyzen təmsil edəcəklər.
ABŞ qanunvericiliyinə əsasən, ölkə prezidentinin səfir vəzifəsinə təqdim etdiyi namizədləri Konqresin Yuxarı Palatası təsdiqləməlidir. ABŞ prezidenti hələ bir neçə ay bundan əvvəl həmin ölkələrə göndəriləcək namizədləri Senata təqdim etsə də, qanunvericilər onları təsdiqləməmişdilər. Parlament tətili zamanı isə ABŞ prezidenti səfirlərin təyinatına dair qərarı təkbaşına qəbul etmək hüququna malikdir. B.Obama da qanunvericiliyin yaratdığı bu imkandan istifadə edib.
Lakin Senat səfirlərin namizədliyini təsdiqləmədiyindən, onların səlahiyyət müddəti qanunvericilik orqanının bir sessiyası çərçivəsində məhdudlaşdırılır. Əgər 2011-ci ilin sonuna qədər Senat Obamanın təyin etdiyi səfirləri təsdiqləməsə, bu diplomatlar öz vəzifələrini tərk etməyə məcbur olacaqlar.{nl}

Qəzənfər QASIMOV, "Xalq qəzeti"