Türkiyə Prezidenti Abdullah Gül İstanbulda keçirilən İqtisadi Əməkdaşlıq Təşkilatının XI Sammitindən sonra keçirdiyi mətbuat konfransında bildirmişdir ki, Azərbaycan torpaqları işğaldan azad edilməli və ölkələrin ərazi bütövlüyü prinsipinə riayət olunmalıdır.
Azərbaycan Prezidenti İlham Əliyevin də Sammitdə bu məsələni vurğuladığını qeyd edən Türkiyənin dövlət başçısı bildirmişdir ki, problemin həlli üçün səylər davam edir. Bugünkü status-kvo heç kimin mənafeyinə uyğun deyildir.
Abdullah Gül onu da bildirmişdir ki, bu yaxınlarda Türkiyədə keçirilmiş QİƏT-in toplantısında Ermənistana işğal olunmuş Azərbaycan torpaqlarını azad etmək, Qafqazda yaranacaq sülh və sabitlik nəticəsində beynəlxalq iqtisadi layihələrə qoşulmaqla bağlı müraciət olunmuşdur. Ümidvarıq ki, bu çətin problem tezliklə sülh yolu ilə həllini tapacaq və qaçqınlar yurd-yuvalarına qayıdacaqlar. Cənubi Qafqazdakı münaqişələrin nizama salınması üçün Türkiyə Sabitlik və Əməkdaşlıq Platforması yaratmağı təklif etmişdi və bu istiqamətdə səylərimiz davam edir.
Türkiyə Prezidenti Abdullah Gül Azərbaycan Prezidenti İlham Əliyevi ad günü münasibətilə təbrik etdiyini və gələcək fəaliyyətində uğurlar arzuladığını da bildirmişdir.

Oqtay BAYRAMOV AzərTAc-ın xüsusi müxbiri
İstanbul