Türkiyənin xarici işlər naziri Əhməd Davudoğlu ABŞ dövlət katibi Hillari Klintona zəng edərək, ondan Birləşmiş Ştatlar administrasiyasının Nümayəndələr Palatasında qondarma "erməni soyqırımı" qətnaməsini gündəlikdən çıxarmaq üçün səylərini artırmasını xahiş etmişdir.
Anadolu agentliyinin diplomatik mənbələrə istinadla verdiyi xəbərə görə, türkiyəli nazir amerikalı həmkarına vəziyyətin ciddi olduğunu bir daha xatırlatmışdır.
Hillari Klinton bildirmişdir ki, ABŞ administrasiyası Türkiyə ilə əlaqələrə böyük əhəmiyyət verir və erməni qətnaməsinin Konqresin gündəliyinə salınmaması üçün əlindən gələni edəcəkdir.
ABŞ Nümayəndələr Palatasının spikeri Nensi Pelosinin "erməni soyqırımı" qətnaməsini yaxın saatlarda gündəliyə daxil etmək istəməsi Türkiyənin Vaşinqtondakı səfirliyini də hərəkətə gətirmişdir. Belə ki, səfirlik Ağ evə və Konqresə məktub ünvanlamış, mart ayında Konqresin Xarici Əlaqələr Komitəsində qəbul olunmuş bu qətnamənin Türkiyə-ABŞ münasibətlərinə ciddi zərbə vuracağını qeyd etmişdir.
Amerika Türk Koalisiyasının sədri Linkoln MakKardi də konqresmenləri erməni iddialarına dair qətnamənin əleyhinə səs verməyə cağırmış, bu məsələnin gündəliyə salınmasının Türkiyə ilə əlaqələrə mənfi təsir edəcəyini bildirmişdir.

Oqtay BAYRAMOV AzərTAc-ın xüsusi müxbiri
Ankara