Azərbaycanın Kiyevdəki səfiri Eynulla Mədətli Ukrayna Ali Radasının xalq deputatı, parlamentin "Ukrayna-Azərbaycan" dostluq qrupunun rəhbəri Eduard Zeynalovla görüşmüşdür.
Söhbət zamanı azərbaycanlı diplomat qeyd etmişdir ki, ölkəmizdə keçirilmiş parlament seçkilərində Yeni Azərbaycan Partiyası növbəti dəfə inamlı qələbə qazanmış, bununla da Azərbaycan cəmiyyətinin hakim partiyaya göstərdiyi yüksək inamı, parlaq perspektivləri onunla bağlamasını bir daha təsdiq etmişdir.
Səfir tam əmin olduğunu bildirmişdir ki, Azərbaycan və Ukrayna parlamentlərarası əlaqələri nəinki uğurla davam edəcək, həm də güclü təkan alacaqdır.
Eduard Cahangir oğlu Zeynalov da öz növbəsində Azərbaycan Milli Məclisinin yeni tərkibinin seçilməsi münasibətilə səfiri təbrik edərək onu əmin etmişdir ki, "Ukrayna-Azərbaycan" parlament dostluq qrupunun rəhbəri kimi iki müstəqil dost dövlətin parlamentlərarası əməkdaşlığının daha da genişlənməsi və dərinləşməsi üçün ondan asılı olan hər şeyi edəcəkdir. Bundan əlavə, E.Zeynalov Milli Məclisin "Azərbaycan-Ukrayna" dostluq qrupunun üzvlərini yaxın vaxtlarda Ukraynaya səfərə dəvət etmişdir.{nl}

Zeynal AĞAZADƏ, AzərTAc-ın xüsusi müxbiri
Kiyev