Koreya Respublikasında rəsmi səfərdə olan Azərbaycan Respublikasının xarici işlər naziri Elmar Məmmədyarov dekabrın 14-də bu ölkənin xarici işlər və ticarət naziri Kim Sunq-Hvan ilə görüşmüşdür.
Xarici İşlər Nazirliyinin mətbuat xidmətindən AzərTAc-a bildirmişlər ki, görüşdə ölkələrimiz arasında münasibətlər yüksək qiymətləndirilərək, əlaqələrin inkişaf etdirilməsi üçün geniş potensialın mövcud olduğu vurğulanmışdır.
E.Məmmədyarov Azərbaycan Respublikasının Şərqi Asiya regionunun inkişaf edən dövlətlərindən biri olan Koreya Respublikası ilə əlaqələrinin hərtərəfli genişləndirilməsinə xüsusi önəm verdiyini qeyd edərək bunun üçün həm dövlət nümayəndələrinin, həm də elm, mədəniyyət və iş adamlarının qarşılıqlı səfərlərinin intensivləşdirilməsinin zəruriliyini vurğulamışdır.
Nazir K.Sunq-Hvanı Azərbaycana səfərə dəvət etmişdir. Koreyalı nazir dəvəti qəbul etmişdir.
K.Sunq-Hvan ölkələrimiz arasında iqtisadi münasibətlərin yüksək sürətlə inkişaf etdiyini, bu əlaqələrin gələcəkdə daha da genişləndirilməsində ölkəsinin maraqlı olduğunu bildirmişdir. Koreyalı nazir Azərbaycanın 2011-2013-cü illərdə ölkəsi üçün prioritet tərəfdaş kimi müəyyən edildiyini vurğulamışdır.
Görüşdə E.Məmmədyarov Ermənistan-Azərbaycan, Dağlıq Qarabağ münaqişəsinin nizamlanmasına dair danışıq prosesi barədə koreyalı nazirə ətraflı məlumat vermiş, ölkəmizin problemin həlli ilə bağlı mövqeyini bildirmişdir.
Koreyalı nazir son vaxtlar regionda cərəyan edən proseslər barədə ətraflı məlumat vermişdir.
Bundan əlavə, görüşdə humanitar sahədə də əlaqələrin genişləndirilməsinin vacibliyi vurğulanmışdır. Azərbaycan Diplomatik Akademiyası ilə Koreya Respublikası Xarici İşlər və Milli Təhlükəsizlik İnstitutu arasında qarşılıqlı təcrübə mübadiləsinin zəruriliyi bildirilmişdir.
Tərəflər bir sıra regional və qlobal məsələlər ətrafında da fikir mübadiləsi aparmışlar.{nl}