Türkiyənin İğdır vilayətində fəaliyyət göstərən Əsassız Erməni İddiaları ilə Mübarizə Dərnəyinin (ASİMDER) nümayəndələri 1915-ci ildə İğdırda ermənilər tərəfindən şəhid edilmiş türklərə aid üç müxtəlif kütləvi məzarlıqdan götürülmüş torpağın Qubadakı soyqırımı məzarlığına göndərilməsi üçün Azərbaycanın Qarsdakı baş konsulluğunda olmuşlar.
Görüşdə ASİMDER-in sədri Göksel Gülbey xalqlarımızın hər zaman erməni vəhşiliklərinə, soyqırımlarına məruz qaldıqlarını bildirmişdir. Qeyd edilmişdir ki, İğdırda aparılan araşdırmalar nəticəsində ortaya çıxarılan üç kütləvi məzarlıqdan götürülən torpağın Qubaya göndərilməsinin əsas səbəbi ermənilərin Anadoluda və Azərbaycanda törətdikləri soyqırımları bütün dünyaya açıq-aydın göstərməkdir.
Azərbaycanın Qarsdakı baş konsulu Ayxan Süleymanov dövlətlərimiz və xalqlarımız arasındakı dostluq və qardaşlıq əlaqələrini heç bir qüvvənin poza bilməyəcəyini bildirmişdir. Azərbaycan və Türkiyənin bir millət, iki dövlət olduğunu qeyd edən baş konsul, şəhid torpağını Qubadakı soyqırımı məzarlığına çatdıracağını bildirmişdir.
AzərTAc{nl}