Noyabrın 24-də Azərbaycanın xarici işlər naziri Elmar Məmmədyarov ölkəmizdə səfərdə olan Argentinanın xarici işlər, beynəlxalq ticarət və din məsələləri üzrə nazir müavini Alberto Pedro D'Alotto ilə görüşmüşdür.
Xarici İşlər Nazirliyinin mətbuat xidmətindən bildirmişlər ki, görüşdə Azərbaycana gəlişindən məmnunluğunu ifadə edən qonaq ölkəmizdə gedən inkişaf prosesinin əyani şahidi olduğunu demişdir. Bu il Argentinada Azərbaycan səfirliyinin açılmasını yüksək qiymətləndirən A.D'Alotto ölkəsinin də eyni addımı atmağa hazırlaşdığını söyləmişdir.
Azərbaycan ilə Argentina arasında əlaqələrin bir çox sahələrdə inkişafı üçün geniş potensialın olduğunu vurğulayan E.Məmmədyarov qarşılıqlı səfərlərin təşkili, iş adamları arasında münasibətlərin yaradılması üçün biznes forumların və digər tədbirlərin həyata keçirilməsinin zəruriliyindən danışmışdır. Nazir qeyd etmişdir ki, ölkəmizin xarici siyasətinin başlıca prioriteti Ermənistanın Azərbaycana qarşı təcavüzünə son qoyulmasıdır.
E.Məmmədyarov Ermənistan-Azərbaycan, Dağlıq Qarabağ münaqişəsinin həllinə dair danışıqlar prosesi barədə qonağa məlumat vermişdir.
A. D'Alotto ölkəsinin ATƏT-in Minsk qrupu çərçivəsində aparılan danışıqlar prosesinə dəstək verdiyini bildirmişdir.
Görüşdə "Azərbaycan Respublikasının Xarici İşlər Nazirliyi və Argentina Respublikasının Xarici İşlər, Beynəlxalq Ticarət və Din Məsələləri Nazirliyi arasında siyasi məsləhətləşmələrə dair Anlaşma Memorandumu" imzalanmışdır.
Sənədi Azərbaycan tərəfdən xarici işlər nazirinin müavini Xələf Xələfov, Argentina tərəfdən isə A.D'Alotto imzalamışlar.{nl}

AzərTAc