Yalan və böhtan yaymaqda ad çıxarmış Ermənistanın kütləvi informasiya vasitələrində Azərbaycanda da yaxşı tanınan məşhur fransız kinoaktyoru Jerar Depardyenin guya "Haystan" ümumerməni fondu ilə birlikdə qondarma, heç bir dövlət və beynəlxalq təşkilat tərəfindən tanınmayan "Dağlıq Qarabağ Respublikası"na yardım məqsədi ilə dünya ictimaiyyətinə müraciət etdiyi barədə xəbərlər yer almışdır.
Azərbaycanın Fransadakı səfiri Elçin Əmirbəyov məsələyə aydınlıq gətirərək bildirmişdir ki, Jerar Depardye onun barəsində yayılmış bu xəbəri qətiyyətlə təkzib etmişdir. Aktyor səfirlə söhbətində guya Dağlıq Qarabağa maliyyə yardımı ilə bağlı beynəlxalq ictimaiyyətə çağırış etməsi barədə erməni KİV-lərinin yaydığı xəbərdən hədsiz dərəcədə təəccübləndiyini bəyan etmişdir.
Kinoaktyor xəbərin tamamilə yalan olduğunu, eyni zamanda, dünyada tanınmış adam kimi hər cür işğal hərəkətini qətiyyətlə pislədiyini bildirmiş və demişdir ki, siyasətdən uzaqdır, ermənilərin yaydığı yalan məlumatda göstərdikləri kimi, hər hansı bir mövqe tutmamışdır.
Jerar Depardye, həmçinin ermənilərin bu yalanını təmiz suyu bulandırmaq kimi qiymətləndirmiş, Azərbaycan Respublikasının Dağlıq Qarabağ regionunun Xankəndi şəhərində "Karot-2010" kinofestivalının açılışında iştirak barədə dəvəti rədd etdiyini və yalnız Yerevana səfər etdiyini vurğulamışdır. O, dəvətin tələ olduğunu dərhal başa düşdüyü üçün Xankəndiyə getməkdən imtina etdiyini, ona veriləcək mükafatı almaq üçün Yerevanda olduğunu bildirmişdir.
Bütün xalqlara hörmətlə yanaşdığını vurğulayan aktyor şəxsi dostu olmuş Mstislav Rostropoviçin xatirəsinə həsr edilmiş musiqi festivalında iştirakı barədə Azərbaycan tərəfinin dəvətini qəbul etdiyini və dekabr ayında ölkəmizə səfər edəcəyini diqqətə çatdırmışdır.

Əsgər ƏLİYEV, AzərTAc-ın xüsusi müxbiri
Paris