Ulu öndər  mədəniyyəti xalqın  böyük sərvəti hesab edirdi. Ona görə də  milli- mənəvi dəyərlərin  qorunması, təbliği  və yeni estetik düşüncəyə  məxsus əsərlərin  yaradılması üçün  mümkün olan  hər şeyi edirdi. Ümummilli lider deyirdi: “Xalq  bir çox xüsusiyyətləri ilə tanınır, sayılır və  dünya xalqları içərisində  fərqlənir. Bu xüsusiyyətlərdən ən yüksəyi, ən böyüyü mədəniyyətdir.”  Mədəniyyət və incəsənətin bir çox sahələri  haqqında irəli sürdüyü qənaətlərində Heydər Əliyev xalqımızın mənəvi simasına güzgü tutan dəyərlərin təbliğini milli ideologiyanın vacib və zəruri komponentlərindən biri olmaq şərtilə ön plana çəkir, mədəniyyəti  milli dövlətçilik məfkurəsinin başlıca tərkib hissələrindən biri sayırdı.

Ulu öndərin incəsənətimizin inkişafı və tərəqqisi naminə atdığı səmərəli addımlar bu sahənin böyük bir epoxasını yaratmışdır. Onun apardığı uğurlu  siyasətin tərkib hissələrindən olan mədəniyyət siyasəti bu gün Azərbaycan mədəniyyətinə və incəsənətinə  özünün intibah mərhələsini yaşatmaqdadır.

Azərbaycanın  qazandığı  bütün uğuların əsasında  dünya miqyaslı siyasi xadim, beynəlxalq aləmdə  adı hörmət  və məhəbbətlə yad edilən ulu öndər Heydər Əliyevin  ölməz ideyaları dayanır.  Milli mədəniyyətimizin də  bugünkü inkişaf tempi  bu ölməz ideyalara söykənir. Bu böyük tarixi şəxsiyyət  ilk dəfə Azərbaycanda hakimiyyətə gəldiyi  vaxtdan  milli-mənəvi dəyərlərimizin əsl mənada himayədarı olmuşdur.

Heydər Əliyev Azərbaycan  mədəniyyətinin  inkişafında yeni  bir dövrün  əsasını qoydu. Mədəniyyətimiz, milli- mənəvi  dəyərlərimiz beynəlxalq miqyasda  tanındı. Ulu öndər yaxşı bilirdi ki, sabahkı uğurlara yeganə təminat sağlam  cəmiyyət qurculuğuna diqqəti artırmaq, köklü mənəvi dəyərləri yeni nəslə  və bütün cəmiyyətə daha dərindən  və əzmlə aşılamaqdır. Mənsub olduğu xalqın tarixi keçmişinə, mədəni irsinə və milli dəyərlər sisteminə sönməz məhəbbət duyğularıyla yanaşan ulu öndər deyirdi: “Bizim hamımızı birləşdirən, həmrəy edən azərbaycançılıq ideyasıdır. Azərbaycançılıq öz milli mənsubiyyətini, milli-mənəvi dəyərlərini qoruyub saxlamaq, eyni zamanda, onların ümumbəşəri dəyərlərlə sintezindən, inteqrasiyasından bəhrələnmək və hər bir insanın inkişafının təmin olunması deməkdir”.

Ulu öndər mədəniyyət və incəsənət xadimlərinin əməyini  həmişə  yüksək qiymətləndirmiş, onların  yaratdıqları əsərlərin   xalqın mənəvi sərvəti olduğunu  bildirmişdi. Hələ  sovetlər dönəmində  nə qədər sənətçilərimiz ulu öndərin   köməkliyi ilə SSRİ-nin  yüksək fəxri adlarına, orden və medallarına layiq görülmüşlər.  Neçə-neçə yazıçı, şair, rəssam, bəstəkar və müğənnimiz  Sosialist Əməyi Qəhrəmanı, SSRİ Xalq artisti  fəxri adlarına layiq görülmüş, SSRİ Dövlət mükafatı laureatı  olmuşlar.

Müstəqillik illərində Azərbaycana rəhbərliyi dövründə də ulu öndər  mədəniyyət və incəsənət  xadimlərinə  öz qayğısını əsirgəməmiş, onların sosial rifah halının yaxşılaşdırılması  üçün  mühüm  tədbirlər həyata keçirmişdir. Məhz  ulu öndərin  hakimiyyəti dövründə  neçə-neçə sənət  adamı   fəxri  adlara layiq görülmüş, Prezident  təqaüdçüsü olmuşdur.  Heydər Əliyev sənət  adamları ilə görüşdən  xüsusi  zövq alırdı. Bu  böyük şəxsiyyətin  daxilində  sənətə böyük sevgi yaşayırdı. Təsadüfi deyildi ki, hərdən  mahnılar oxuyur,  memarlara şəhərsalma ilə bağlı məsləhətlər verirdi. Hər dəfə  teatr xadimləri ilə, musiqiçilərlə səhnə arxasında  görüşlərində  onların problemləri ilə maraqlanır,  öz tövsiyə və  tapşırıqlarını verirdi.

Milli dəyərlərimizə dərindən bələd olan ümummilli liderimiz  xarici ölkələrə səfərləri zamanı soydaşlarımızla görüşlərində onlara harada yaşamalarından asılı olmayaraq azərbaycançılıq ideologiyasına sadiqliyi, xalqımıza xas olan adət-ənənələrimizi yaşatmağı, təbliğ etməyi tövsiyə edirdi: “Bizim hamımızın bir Vətəni var - bu, Azərbaycandır. Azərbaycanlı hər yerdə yaşaya bilər, ancaq azərbaycanlılığını, öz dilini, milli ənənələrini unutmamalıdır. Onun qəlbi daim doğma Azərbaycanla bir vurmalıdır”.

Ədəbiyyat və sənətlə, teatr və kino ilə, folklor və yazılı abidələrlə, rəssamlıq və heykəltəraşlıqla,  musiqi və ifaçılıqla bağlı qənaətlərində  Heydər Əliyev incəsənətin daxili qanunauyğunluqlarına və inkişaf perspektivlərinə yüksək professionallıqla yanaşan bir sənət nəzəriyyəçisi kimi çıxış edirdi. Heydər Əliyev rəssamlıq və musiqi sənətinə böyük qayğı ilə yanaşırdı. O, bu sahələrin milli-mənəvi dəyərlərimiz sırasında əhəmiyyətli yer tutduğunu dəfələrlə qeyd etmişdi. Heydər Əliyevin Səttar Bəhlulzadə, Maral Rəhmanzadə, Elmira Şahtaxtinskaya, Tahir Salahov, Toğrul Nərimanbəyov, Oqtay Sadıqzadə, tanınmış rus rəssamı Nikas Safonovun timsalında çağdaş rəngkarlıq sənətinin nailiyyətlərini, Üzeyir Hacıbəyli, Qara Qarayev, Niyazi, Fikrət Əmirov, Bülbül,  Arif Məlikov kim qüdrətli sənət korifeylərinin əsərlərindəki milli-mənəvi dəyərlərin xalqımız üçün iftixar mənbəyi olduğunu təsdiqləyən fikir və mülahizələri bunu bir daha təsdiq edir.

Ulu öndərin  şəxsiyyəti, Azərbaycan  xalqının tarixindəki misilsiz rolu bu gün incəsənətimiz üçün tükənməz mövzu mənbəyidir. Rəssamlarımız dəfələrlə  bu böyük şəxsiyyətin obrazını yaratmış,   haqqında neçə-neçə musiqi əsəri bəstələnmiş, bu dahi insanın ömür yoluna  həsr olunan filmlər çəkilmişdir. Kinorejissor  Vaqif Mustafayevin  lentə aldığı çoxseriyalı sənədli   film  ulu öndərin həyat və fəaliyyətinin  bir növ  xronikasıdır.  “Əsl məhəbbət haqqında”, “General”, “Birinci”, “Moskva. Kreml”, “Lider”, “Tale”, “Bir həsədin tarixi”, “Professional”, “Patriot”, “Xüsusi təyinat” filmləri  ulu öndərin  həyatından  qiymətli fraqmentləri tamaşaçılara çatdırır. Bu əsərlərin hər biri  incəsənət tariximizin dəyərli  nümunələri kimi  əbədi  qalacaqdır. Bizə isə bu əsərləri qorumaq və gələcək nəsillərə  çatdırmaq  qalır.

Bu gün dövlət milli dəyərlərimizin qarantına çevrilmişdir.  Ulu öndərin mədəniyyət siyasətini uğurla davam etdirən cənab Prezident İlham Əliyev milli-mənəvi dəyərlərimizin inkişafına, qorunmasına  və xarici ölkələrdə təbliğinə  xüsusi önəm  verir. Heydər Əliyev Fondunun  prezidenti, UNESCO-nun və  İSESCO-nun  xoşməramlı səfiri, Milli Məclisin deputatı Mehriban  xanım Əliyevanın da  mədəniyyətimizin inkişafındakı  xidmətləri  olduqca böyükdür. Mehriban xanımın səyləri nəticəsində bu gün  Azərbaycanın muğam, xalça, aşıq, tar ifaçılığı sənətləri UNESCO-nun  Qeyri-Maddi Mədəni İrs siyahısına daxil edilmişdir.

 Dövlət siyasətində hər bir azərbaycanlının, ən əvvəl, öz xalqının dəyərlərinə sahib çıxması, öz mədəniyyətini, adət-ənənəsini, mentalitetini və milli dəyərlərini qoruması önə çəkilir. “Gələcək nəsillərə maddi sərvətlər və iqtisadi mirasla yanaşı, həm də daha çox milli irs, milli mentalitet ərməğan edilməlidir” prinsipi əsas götürülür. Prezident İlham Əliyevin konsepsiyasına görə, milli ruhu qorumağın, inkişaf etdirməyin və yeni nəsillərə çatdırmağın ən mühüm şərti məhz milli dövlətçilikdir. Dövlət ancaq ərazinin, maddi sərvətlərin deyil, həm də milli-mənəvi dəyərlərin qorunmasına xidmət edir.  Bu mənada  milli-mədəni irsə  diqqətin artırılması olduqca vacib məsələdir.

Heç şübhəsiz,  Azərbaycan mədəniyyəti bu gün də ulu öndərin ölməz ideyalarından güc alır, inkişaf edir, zənginləşir, sürətlə inteqrasiya olunur.

Elçin ORUCOV,
Əməkdar mədəniyyət işçisi,
rəssam