Türkiyənin xarici işlər naziri Əhməd Davudoğlu "Gənc yaklaşım" jurnalına müsahibəsində bildirmişdir ki, ermənilər Türkiyə ilə münasibətləri və bölgədəki vəziyyətlərini normallaşdırmaq niyyətini konkret əməlləri və düşüncələri ilə göstərməlidirlər. Yalnız belə olan təqdirdə biz neçə əsrlər birlikdə yaşadığımız bu insanlarla yeni münasibətlər qura bilərik. Bunun üçün Türkiyənin birtərəfli qaydada atacağı addımlar yetərli deyildir.
Türkiyə xarici siyasət idarəsinin başçısı əlavə etmişdir ki, erməni lobbisi və Ermənistan dövləti, ilk növbədə, radikal mövqedən əl çəkməlidirlər. ABŞ da daxil olmaqla, müxtəlif ölkələrin parlamentlərində qondarma "soyqırımı" iddialarının müzakirə və qəbul olunması hüquqi və siyasi cəhətdən problemlər yaradır. Türklərin həmin illərdə və sonralar çəkdikləri acıların, itkilərin də nəzərə alınmaması istər elmi, istərsə də əxlaqi baxımdan bir nöqsandır. Qanunverici orqanların məhkəmələrin yerinə qoyularaq hökm vermələri, tarixçiləri əvəz edərək tarix yazmaları da doğru deyildir. Bu proseslər Türkiyənin Ermənistanla normallaşdırmaq istədiyi münasibətlərə və Cənubi Qafqazda sabitliyin və sülhün bərqərar olmasına zərər vurur. Bu səbəbdən, biz sözdə "soyqırımı" təbliğatı ilə mübarizəyə davam edəcəyik.

Oqtay BAYRAMOV AzərTAc-ın xüsusi müxbiri
Ankara