Azərbaycanda rəsmi səfərdə olan Türkiyə Respublikasının milli müdafiə naziri Vecdi Gönül noyabrın 3-də Azərbaycanın müdafiə naziri, general-polkovnik Səfər Əbiyevlə görüşmüşdür.
Fəxri Xiyabanda ümummilli lider Heydər Əliyevin və akademik Zərifə Əliyevanın məzarlarını, Şəhidlər Xiyabanını ziyarət etdikdən sonra türkiyəli qonağın Müdafiə Nazirliyində təntənəli qarşılanma mərasimi keçirilmiş, hər iki ölkənin dövlət himnləri səslənmişdir.
Müdafiə Nazirliyinin mətbuat xidmətindən bildirmişlər ki, geniştərkibli görüşdə Səfər Əbiyev bildirmişdir ki, Azərbaycan və Türkiyə tarix boyu bir-birinə arxa-dayaq olmaqla yanaşı, sınaq günlərində də birlikdə olmuşlar. O demişdir: "Azərbaycan erməni işğalına məruz qaldığı ilk vaxtlarda da biz bunu yaxından hiss etdik". Nazirin sözlərinə görə, təəssüf doğuran haldır ki, bir sıra beynəlxalq qurumlarda istər Azərbaycan xalqına, istərsə də Türkiyəyə qarşı yönəlmiş terrorçuluq fəaliyyəti özünün lazımi qiymətini almamışdır.
Dağlıq Qarabağ münaqişəsinə toxunan nazir S.Əbiyev Ermənistanın Azərbaycana qarşı apardığı işğalçılıq siyasətinin nəticələrinin aradan qaldırılması və problemin danışıqlar yolu ilə həll edilməsinə dair proseslərin davam etdiyini vurğulamışdır. Sülh danışıqlarının nəticə vermədiyi halda, Azərbaycanın başqa imkanlardan istifadə edəcəyi istisna deyildir.
Müdafiə naziri S.Əbiyev bildirmişdir ki, ölkələrimiz arasında hərbi, hərbi-texniki və hərbi təhsil sahəsində əlaqələr inkişaf etməkdədir və gələcəkdə də həmin prinsiplər əməkdaşlığın prioritetlərini təşkil edəcəkdir. Nazir demişdir ki, bugünkü görüşlərimiz, apardığımız danışıqlar dostluq və əməkdaşlığımızın genişlənməsinə yeni töhfələr verəcəkdir.
Türkiyənin milli müdafiə naziri Vecdi Gönül, öz növbəsində, Azərbaycanla Türkiyənin müxtəlif istiqamətlərdə, o cümlədən, müdafiə sahəsində geniş əməkdaşlığından söhbət açaraq bu əlaqələrin dərinləşdirilməsinin zəruriliyini vurğulamışdır.