Azərbaycanda keçirilən parlament seçkilərini izləmək məqsədilə Slovakiyanın nümayəndə heyəti ölkəmizdə səfərdə olub. Nümayəndə heyətinin üzvü,  Slovakiya Parlamentinin deputatı Jasan Viliamla “Park inn” mehmanxanasında həmsöhbət olduq. Seçkiləri beynəlxalq müşahidəçi qismində izləyən Slovakiya parlamentinin üzvü noyabr ayında keçirilən seçkinin nəticələri ilə bağlı öz təəssüratlarını qəzetimizə bildirdi.

 Jasan Viliam seçki günü bir neçə məntəqədə olduğunu diqqətə çatdıraraq səsvermə prosesinin tam sakit şəkildə, beynəlxalq normalara uyğun keçdiyini bildirdi.  Seçici fəallığının yüksək olduğunu xüsusi qeyd edən slovakiyalı parlamentari bunun hazırlıq prosesinin düzgün qurulması ilə birbaşa əlaqəli olduğunu söylədi. J.Viliam qeyd etdi ki, məntəqələrə gələn seçicilər heç bir kənar müdaxilə olmadan səs verirdilər. O, müxtəlif partiyaların namizədlərinin müşahidəçiləri üçün məntəqələrdə hər cür şərait yaradıldığının şahidi olduğunu da vurğuladı.

Slovakiyalı deputat həmçinin bildirdi ki, o, indiyə kimi bir çox ölkələrdə müşahidəçi kimi çıxış edib. Lakin çox az ölkədə seçki məntəqələrində veb-kameraların quraşdırıldığının şahidi olub. Amma Azərbaycanda müşahidə apardığı seçki məntəqələrinin çoxunda veb-kameralar olub. Onun fikrincə, bu üsul şəffaflığın təmin olunmasında böyük rol oynayır. Veb-kameralar vasitəsilə dünyanın istənilən nöqtəsindən seçkilərin gedişini izləmək mümkündür.

Sonda Jasan Viliam qeyd etdi ki, o, Azərbaycan xalqının yüksək mədəniyyətə sahib olması haqda müəyyən təsəvvürlərə malik idi. Son illər ölkəmizdə keçirilən bir sıra beynəlxalq səviyyəli idman yarışları, “eurovision” mahnı müsabiqəsi və digər tədbirlər barədə məlumatlı olub. Lakin noyabrın 1-də Azərbaycanın böyük uğurlarının canlı şahidi olub.

Jasan Viliam dedi: Müşahidələrimə əsasən deyə bilərəm ki, Şərqdə ilk dəfə qadınlara səsvermə hüququ verən Azərbaycanda parlament seçkiləri yüksək səviyyədə keçirildi. Azərbaycan xalqı bütün dünyaya yüksək seçki mədəniyyəti nümayiş etdirdi.

Elçin ABBASOV,
“Xalq qəzeti”