Azərbaycan Respublikasının Fransadakı səfirliyi fransız deputat F. Roşbluanın təşkilatçılığı ilə bir qrup deputatın bir müddət əvvəl Dağlıq Qarabağa səfəri ilə bağlı Fransanın Milli Assambleyasına ünvanladığı etiraz məktubuna cavab alınmışdır.
Azərbaycan Xarici İşlər Nazirliyinin mətbuat xidmətindən AzərTAc-a daxil olan məlumatda deyilir ki, məktubda Fransa Milli Assambleyasının sədri Bernar Akuoye bu hadisədən xəbəri olmadığını və bu məlumatı səfirliyin məktubundan sonra əldə etdiyini bildirmişdir.
B.Akuoye bu səfərin qətiyyən Milli Assambleyanın rəsmi missiyası olmadığını və fransız deputatların şəxsi səfəri olduğunu qeyd etmişdir. O, həmçinin səfərin Milli Assambleyanın hesabından maliyyələşdirilmədiyini də məktubunda qeyd etmişdir.
Milli Assambleyanın sədri həmin deputatların tutduqları qeyri-rəsmi mövqeyin Minsk qrupunun tərkibində Dağlıq Qarabağ münaqişəsinin sülh yolu ilə həlli ilə bağlı səylərini davam etdirməkdə olan Fransanın iştirakını şübhə altına almayacağını vurğulamışdır.{nl}