Naxçıvan Muxtar Respublikası Ali Məclisinin sədri Vasif Talıbov oktyabrın 19-da ATƏT-in Demokratiya və İnsan Hüquqları Müdafiəsi Təşkilatı missiyasının başçısı, səfir Andri Qlover və hüquqşünas Mariana Skopa ilə görüşmüşdür.
Görüşdə muxtar respublikada parlament seçkilərinə hazırlığın vəziyyəti və seçki kampaniyasının aparılması ilə bağlı məsələlər müzakirə edilmişdir.
V.Talıbov demişdir ki, muxtar respublikada Azərbaycan Respublikası Milli Məclisinə və Naxçıvan Muxtar Respublikasının Ali Məclisinə keçiriləcək seçkilər üçün lazım olan texniki işlər başa çatdırılmış, Azərbaycan Respublikası və Naxçıvan Muxtar Respublikası mərkəzi seçki komissiyaları tərəfindən sənədləşmə, təchizat işləri həyata keçirilmişdir. Beynəlxalq təşkilatlar tərəfindən Azərbaycana göndərilən müşahidəçilərin Naxçıvana da gəlmələri nəzərdə tutulmuşdur. Artıq muxtar respublikaya gələn uzunmüddətli müşahidəçilər yerli seçki orqanları ilə birgə fəaliyyətlərini qura bilmişlər. Onların öz fəaliyyətlərini səlahiyyətləri daxilində yerinə yetirmələri üçün heç bir problem yoxdur.
Missiyanın başçısı səfir Andri Qlover muxtar respublikaya səfərinin məqsədi barədə məlumat vermiş, səmimi görüşə görə minnətdarlığını bildirmişdir.{nl}