Rəsmi Bakı dəfələrlə Azərbaycanın erməni işğalı altında olan ərazilərinə qiymətləndirici missiyanın göndərilməsi ilə bağlı ATƏT-ə və digər beynəlxalq təşkilatlara müraciətlər ünvanlamışdır.
Bu sözləri Azərbaycan Respublikası Prezidenti Administrasiyasının ictimai-siyasi məsələlər şöbəsinin müdiri Əli Həsənov jurnalistlərə müsahibəsində bildirmişdir. Ə.Həsənov demişdir ki, bu müraciətlərin əsasını işğal olunmuş Azərbaycan torpaqlarının biosferinin məhv edilməsi, orada yanğınların törədilməsi, zəbt edilmiş ərazilərdə qeyri-qanuni məskunlaşma, silah və silahlı qüvvələr yerləşdirilməsi, narkotik maddələr becərilməsi, istehsalı, qaçaqmalçılıq və başqa məsələlər təşkil edir.
Bu məsələlərlə bağlı Azərbaycanın müvafiq qurumları bir neçə dəfə qiymətləndirici missiyalara müraciət etmiş və onların həmin ərazilərə gəlmələrini təmin etmişdir. Hazırkı missiya da onlardan biridir. Əminik ki, bu missiya obyektiv işləyəcək və ermənilərin bölgədə beynəlxalq hüquq normalarına uyğun gəlməyən əməllərinin qarşısının alınması üçün əhəmiyyətli tədbirlər görəcəkdir.{nl}