Azərbaycan Respublikası xarici işlər nazirinin müavini Xələf Xələfov oktyabrın 4-də Vaduz şəhərində Lixtenşteyn Knyazlığının xarici işlər naziri xanım Aureliya Friklə görüşmüşdür.
Xarici İşlər Nazirliyinin mətbuat xidmətindən bildirmişlər ki, görüşdə ikitərəfli münasibətlər, beynəlxalq təşkilatlar çərçivəsində qarşılıqlı fəaliyyətin davam etdirilməsi və digər məsələlər müzakirə edilmişdir. Tərəflər Azərbaycan və Lixtenşteyn arasında ikitərəfli və çoxtərəfli əməkdaşlığı, dostluq münasibətlərini müsbət qiymətləndirmişlər. Müxtəlif beynəlxalq təşkilatlar çərçivəsində əməkdaşlıqdan məmnunluq ifadə olunmuş, siyasi, iqtisadi və mədəni sahələrdə münasibətlərin genişləndirilməsi imkanları nəzərdən keçirilmişdir.
X.Xələfov ölkəmizdə həyata keçirilən iqtisadi islahatlar, dinamik iqtisadi inkişaf, regiondakı vəziyyət, Ermənistanın Azərbaycana hərbi təcavüzünün ağır nəticələri, Ermənistan - Azərbaycan, Dağlıq Qarabağ münaqişəsinin həlli ilə bağlı ATƏT-in Minsk qrupu çərçivəsində aparılan danışıqlar barədə məlumat vermişdir. O, həmçinin Azərbaycanın təşəbbüsü ilə həyata keçirilən regional və beynəlxaq əhəmiyyətli enerji, nəqliyyat və kommunikasiya layihələrinin regionda davamlı inkişafın və sabitliyin bərqərar olmasına xidmət etdiyini vurğulamışdır.
Xanım A. Frik ölkəsinin Azərbaycan ilə mədəniyyət və iqtisadiyyat sahələrində əməkdaşlığa hazır olduğunu, beynəlxalq təşkilatlar çərçivəsində əlaqələri davam etdirmək niyyətində olduqlarını qeyd etmişdir.
Görüşdə Azərbaycan Respublikasının İsveçrə Konfederasiyasında və Lixtenşteyn Knyazlığındakı səfiri Murad Nəcəfbəyli iştirak etmişdir.
AzərTAc{nl}