Sentyabrın 4-də Avropa Şurası Parlament Assambleyasının (AŞPA) payız sessiyası günün ikinci yarısında Nazirlər Komitəsinin fəaliyyətdə olan sədri, Makedoniyanın xarici işlər naziri Antonio Miloşoskinin rəhbərlik etdiyi qurumun sessiyalararası fəaliyyətinə dair hesabatı ilə öz işini davam etdirmişdir.
Avropa Şurasının Nizamnaməsinə uyğun olaraq hesabatdan sonra sədr deputatların ona ünvanladıqları yazılı və şifahi sorğuya cavab vermişdir. Bu imkandan istifadə edən Azərbaycanın AŞPA-dakı nümayəndə heyətinin üzvü Rafael Hüseynov sədrə aşağıdakı sualla müraciət etmişdir: Avropanın gələcəyi onun bütövləşməsində, dövlətlərin bir-birinə daha artıq yaxınlaşmasında, sərhədlərin daha şəffaf olmasındadır. Amma bu yaxınlaşmanın təməl şərtlərindən ilkini dövlətlərin bir-birinin ərazi bütövlüyünə və sərhədlərin toxunulmazlığına hörmətlə yanaşmasıdır.
Avropa Şurasına (AŞ) üzv dövlətlər arasında həmin ali prinsipi nümayişkaranə şəkildə pozan dövlətlər varsa, bu, Avropanın gələcəyinə açıq qəsd deyilmi? Nazirlər Komitəsi belə arzuolunmaz vəziyyəti aradan qaldırmaq üçün öz səlahiyyətləri çərçivəsində hansı qəti addımlar ata bilər?
Antonio Miloşoski sualla bağlı cavabında bildirmişdir ki, dövlətlərin ərazi bütövlüyü Avropa Şurası üçün ən ali prinsipdir. Bu baxımdan AŞ həmin prinsipin istər üzv dövlətlər arasında, istərsə də ümumiyyətlə dünyada tam bərqərar olmasının tərəfdarıdır. Biz AŞ üzvlərinin birinin digərinin ərazisini hər hansı şəkildə zəbt etməsi, ərazi bütövlüyünü, sərhəd toxunulmazlığını pozmasını heç vəchlə qəbul etmirik.
Ermənistan-Azərbaycan, Dağlıq Qarabağ münaqişəsi AŞ-nin daim diqqət mərkəzində olan məsələdir. Biz bu problemin diplomatik vasitələrlə, sülh yolu ilə həllinin tərəfdarıyıq. Amma bu istiqamətdə irəliləyişlər də vardır. Bu irəliləyişlər böyük deyil, addım-addımdır. Amma əsas odur ki, bu proses var və biz arzu edirik ki, Ermənistan-Azərbaycan, Dağlıq Qarabağ münaqişəsi öz müsbət həllini tapsın.
Nümayəndə heyətimizin digər üzvü Qənirə Paşayeva sədrə ünvanladığı sualda demişdir: Avropa Şurasının üzvü olan Ermənistan 17 ildən artıqdır ki, digər üzv dövlətin - Azərbaycanın 20 faizdən artıq ərazisini zəbt etmiş, bir milyondan çox azərbaycanlını öz doğma torpaqlarından didərgin salmışdır. Qaçqın və köçkün vəziyyətində yaşayan bu insanların hüquqları pozulmuşdur. Avropa Şurası bu istiqamətdə hansı konkret addımlar ata bilər ki, problem tez həll edilsin?
Nazirlər Komitəsinin sədri sualın cavabında demişdir: Biz sizin bu məsələyə həssaslığınızı başa düşürük. Nazirlər Komitəsi dəfələrlə bu məsələni qaldırmışdır. Ermənistan-Azərbaycan, Dağlıq Qarabağ münaqişəsinin həlli məsələsi ilə xüsusi mandatı olan ATƏT-in Minsk qrupu məşğul olur. Biz də öz tərəfimizdən maraqlıyıq ki, problem sülh yolu ilə həll olunsun. Nazirlər Komitəsi də öz imkanları çərçivəsində münaqişənin tezliklə həll edilməsinə töhfəsini verməyə hazırdır.
İş gününün sonunda Almaniyanın xarici işlər naziri Guido Vestervell ölkəsində insan hüquqlarının qorunması sahəsində görülən işlərdən bəhs etmiş, dünyanın qaynar nöqtələrində baş verən hadisələrə münasibətini bildirmişdir.
Oktyabrın 5-də sessiya öz işini davam etdirəcəkdir.{nl}

Əsgər ƏLİYEV AzərTAc-ın xüsusi müxbiri
Strasburq