Azərbaycan ilə Küveyt arasında qanunvericilik sahəsində əlaqələr genişlənir, deputatlarımız beynəlxalq təşkilatlarda səmərəli əməkdaşlıq edirlər. Bu, ölkələrimiz və xalqlarımız arasında münasibətlərin inkişafında mühüm rol oynayır.
Bu fikirlər ölkəmizdə səfərdə olan Küveytin Gənclər və İdman Məsələləri üzrə Dövlət Komitəsinin sədri, general Feysəl Musaid Əl-Cəzzafın parlamentdə Milli Məclis sədrinin müavini Valeh Ələsgərovla keçirdiyi görüşdə səslənmişdir.
V.Ələsgərov qonaqlara ölkəmizdə həyata keçirilən hüquqi, demokratik, iqtisadi islahatlar barədə ətraflı məlumat vermiş, Azərbaycan dövlətinin gənclərə xüsusi diqqət və qayğı göstərdiyini bildirmiş, gənclər siyasəti ilə bağlı Milli Məclisdə qəbul olunmuş qanunlardan danışmışdır.
Milli Məclis sədrinin müavini ölkələrimiz arasındakı münasibətlərin genişlənməsində Azərbaycan-Küveyt parlamentlərarası dostluq qrupunun rolunu yüksək qiymətləndirmişdir.
Ölkələrimiz arasında əlaqələrin inkişafında qanunverici orqanların əməkdaşlığının mühüm əhəmiyyət kəsb etdiyini deyən Feysəl Musaid Əl-Cəzzaf Bakıda keçirdiyi görüşlərdən razılığını ifadə etmiş və bu görüşlərin çox səmərəli olduğunu bildirmişdir. O, Küveytin Azərbaycan ilə əlaqələrin inkişafında maraqlı olduğunu qeyd etmişdir.
Azərbaycan-Küveyt parlamentlərarası əlaqələr üzrə işçi qrupunun rəhbəri Əkrəm Abdullayev bildirmişdir ki, yaxın günlərdə Küveyt parlamentinin bir qrup üzvü Azərbaycana gələcəkdir. O, bu səfərin qanunvericilik sahəsində əməkdaşlığın genişləndirilməsinə yaxşı töhfə verəcəyinə ümidvar olduğunu bildirmişdir.
Küveytli qonaqlar Milli Məclisin fəaliyyəti, parlamentdəki iş şəraiti ilə də yaxından tanış olmuşlar.
AzərTAc