Azərbaycanda səfərdə olan Çexiya Senatının Avropa İttifaqı məsələləri Komitəsinin sədri Ludek Sefziqin başçılıq etdiyi nümayəndə heyəti sentyabrın 28-də Milli Məclisin hüquq siyasəti və dövlət quruculuğu komitəsinin üzvləri ilə görüşmüşlər.
Komitənin sədri Əli Hüseynov qurumun fəaliyyəti barədə məlumat vermişdir. Komitə sədri demişdir ki, Avropaya inteqrasiya edən Azərbaycan öz qanunlarını da Avropa standartlarına uyğunlaşdırır. Bu işdə hüquq siyasəti və dövlət quruculuğu komitəsi mühüm rol oynayır.
Hazırda Azərbaycan öz qanunvericiliyini "Şərq Tərəfdaşlığı" Proqramı çərçivəsində Avropa qanunvericiliyinə uyğunlaşdırmaq üçün mühüm işlər görür. Çexiya 2001-ci ildən Avropa İttifaqının üzvüdür. Bu baxımdan da Çexiyanın təcrübəsini öyrənmək bizim üçün faydalı olar.
Ludek Sefziq demişdir ki, səfərin məqsədi Azərbaycan ilə Çexiya arasında münasibətlərin daha da möhkəmləndirilməsinə dair fikir mübadiləsi aparmaqdır. Həmçinin Avropa İttifaqının "Şərq Tərəfdaşlığı" Proqramı çərçivəsində qonşuluq siyasətini inkişaf etdirməkdir. Ölkələrimiz arasında əlaqələrin inkişaf etdirilməsi hər iki tərəf üçün vacibdir. Biz sizin komitənin işini yüksək qiymətləndiririk. Hüquq siyasəti və dövlət quruculuğu mühüm bir sahə olduğuna görə, fəaliyyətiniz böyük əhəmiyyətə malikdir.
Görüşdə qanunvericilik bazasının təkmilləşdirilməsi sahəsində birgə əməkdaşlıq, qarşılıqlı səfərlərin intensivləşdirilməsi, təcrübə mübadiləsi və digər məsələlər ətrafında fikir mübadiləsi aparılmışdır.{nl}