Sentyabrın 28-də Mərkəzi Seçki Komissiyasında (MSK) sədr Məzahir Pənahov səfir Odri Qloverin başçılıq etdiyi ATƏT-in Müşahidə Missiyasının üzvləri ilə görüşmüşdür.
Qonaqları salamlayan M.Pənahov bildirmişdir ki, Mərkəzi Seçki Komissiyası seçkilərin hazırlanması və keçirilməsi zamanı aşkarlıq prinsiplərinə riayət olunmasına böyük əhəmiyyət verir, seçki komissiyalarının fəaliyyətinin, seçki prosesinin şəffaf olması üçün bütün qanuni addımları atır.
MSK-nın mətbuat xidmətindən bildirmişlər ki, müşahidə missiyasının rəhbəri xanım Odri Qlover Milli Məclisə seçkilərlə bağlı MSK-nın gördüyü işlərlə maraqlanmışdır.
MSK-nın sədri seçici siyahılarının dəqiqləşdirilməsi, seçki subyektlərinin maarifləndirmə proqramı, hazırki seçkiqabağı vəziyyət, gələcəkdə görülməsi planlaşdırılan işlər barədə qonaqlara ətraflı məlumat vermişdir.
Səfir Odri Qlover sentyabrın 30-da ATƏT Müşahidə Missiyasının 22 nəfər uzunmüddətli müşahidəçisinin, noyabrın 3-də isə qısamüddətli müşahidəçilərinin Azərbaycana gələcəklərini bildirmişdir.
Görüşdə Mərkəzi Seçki Komissiyası ilə ATƏT-in Müşahidə Missiyası arasında əməkdaşlığa dair fikir mübadiləsi də aparılmışdır.
AzərTAc{nl}