Sentyabrın 24-də Mərkəzi Seçki Komissiyasında sədr Məzahir Pənahov Avropa Şurası Venesiya Komissiyasının katibi Tomas Markertin başçılıq etdiyi nümayəndə heyəti ilə görüşmüşdür.
Qonaqları salamlayan sədr bildirmişdir ki, Mərkəzi Seçki Komissiyası hər zaman beynəlxalq qurumlarla münasibətlərə ciddi önəm verir və Avropa Şurası, eyni zamanda Venesiya Komissiyası ilə səmərəli əməkdaşlıqdan məmnunluq duyur. Venesiya Komissiyası ilə MSK-nın faydalı əməkdaşlığı 2003-cü ildən başlamışdır və birgə fəaliyyət ölkəmizdə demokratiyanın inkişafına əhəmiyyətli töhfələr vermişdir.
Venesiya Komissiyası ilə MSK-nın uzun müddətdən bəri sıx əməkdaşlıq etdiyini vurğulayan Tomas Markert Azərbaycanın iqtisadi sahədə ciddi tərəqqi əldə etdiyini nəzərə çatdırmış və qeyd etmişdir ki, bu resurslardan, həmçinin, demokratiyanın inkişafı üçün də geniş istifadə olunmasından çox məmnundur.
Qonaqlar seçkilərin hazırlanıb keçirilməsi ilə bağlı Mərkəzi Seçki Komissiyasının gördüyü işlərlə maraqlanmışlar.
MSK-nın sədri seçici siyahılarının dəqiqləşdirilməsindən danışaraq bu prosesin yanvar ayından başlandığını və hazırda da davam etdirildiyini söyləmişdir. O, rəhbərlik etdiyi qurumun həyata keçridiyi maarifləndirmə proqramı barədə ətraflı məlumat verərək bu proqram çərçivəsində Avropa Şurası Venesiya Komissiyası ilə birgə həyata keçirilmiş tədbirlərdən də söz açmışdır. Oktyabr ayında da aşağı seçki komissiyaları üçün trenerlərin hazırlanması ilə bağlı birgə treninqlər təşkil ediləcəkdir. MSK-nın sədri hazırkı seçkiqabağı vəziyyət, gələcəkdə görülməsi planlaşdırılan işlər barədə də qonaqlara məlumat vermişdir.
Qonaqlar MSK-nın Azərbaycanda seçkilərin təşkili və keçirilməsi sahəsində, habelə seçici siyahılarının dəqiqləşdirilməsi işində böyük uğurlar əldə etdiyini vurğulamış, seçkilərə hazırlıqla bağlı görülən işlərdən razılıqlarını bildirmişlər.
Görüşdə Mərkəzi Seçki Komissiyası ilə Avropa Şurasının Venesiya Komissiyası arasında əməkdaşlığa dair fikir mübadiləsi də aparılmışdır.{nl}