Azərbaycan ilə Mərakeş Krallığı arasında əlaqələr yüksələn xətlə inkişaf edir. Bizim qarşılıqlı səfərlərimiz bu əlaqələri daha da genişləndirir.
Bu sözləri Azərbaycana səfərə gələn Mərakeş Krallığı Parlamenti Nümayəndələr Palatasının sədri Abdelvahed Radi Heydər Əliyev Beynəlxalq Aeroportunda jurnalistlərə müsahibəsində demişdir.
Qonaq bildirmişdir ki, dövlətlərimizin başçıları arasında çox gözəl dostluq münasibətləri vardır. Bu da iki qardaş ölkə olan Mərakeş və Azərbaycan arasında münasibətləri, eləcə də parlamentlərimiz arasında əlaqələri daha yüksək səviyyəyə qaldırmağa imkan verir. Səfərimin əsas məqsədi də bu və digər məsələlər ətrafında fikir mübadiləsi aparmaqdır. Qonaq onu da vurğulamışdır ki, deputatlarımız beynəlxalq təşkilatlarda bir sıra məsələlərin müzakirəsində eyni mövqedən çıxış edirlər. Biz buna sevinirik və parlamentarlarımızın beynəlxalq əməkdaşlığını dəstəkləyirik.{nl}