Azərbaycanın Meksikadakı səfirliyindən bildirmişlər ki, Nyu-Yorkda BMT-nin Baş Məclisinin 65-ci sessiyasında iştirak edən xarici işlər naziri Elmar Məmmədyarov meksikalı həmkarı xanım Patrisia Espinoza ilə görüşmüşdür.
Görüşdə Azərbaycan ilə Meksika arasında müxtəlif istiqamətlərdə ikitərəfli əlaqələrin inkişaf perspektivləri müzakirə olunmuşdur.
E.Məmmədyarov P.Espinozanın 2011-ci ilin yanvarında Meksikaya rəsmi səfərə dəvətini qəbul etmişdir. Dəvətə görə təşəkkürünü bildirən E.Məmmədyarov ölkələrimiz arasında siyasi əlaqələrin genişləndirilməsinin, beynəlxalq təşkilatlar çərçivəsində səmərəli əməkdaşlığın vacibliyini vurğulamışdır.
P.Espinoza Azərbaycanın Meksikada səfirliyinin fəaliyyətə başlaması münasibətilə öz hökuməti adından minnətdarlığını bildirmiş, ölkələrimiz arasında ikitərəfli əlaqələrin genişləndiyini, qarşılıqlı səfərlərin həyata keçirildiyini və münasibətlərin inkişafı istiqamətində fəal iş aparıldığını diqqətə çatdırmışdır.
Xanım nazir gələn il Meksikanın Bakıda səfirliyinin fəaliyyətə başlamasının mümkünlüyünü bildirmişdir.
P.Espinoza Meksikanın müstəqilliyinin 200 illik yubiley tədbirləri çərçivəsində bu ilin martında Meksikada Azərbaycan mədəniyyəti günlərinin keçirildiyini qeyd etmiş, Azərbaycan tərəfindən qarşılıqlı mədəni əlaqələrin inkişafına verilmiş əhəmiyyətli töhfəni yüksək qiymətləndirmişdir.
Azərbaycanın Meksikadakı səfiri İlqar Muxtarovun da iştirak etdiyi bu görüşdə regional və beynəlxalq məsələlər ətrafında fikir mübadiləsi aparılmışdır.{nl}