NATO Parlament Assambleyasının (PA) Siyasi Komitəsinin NATO tərəfdaşlığı üzrə Alt Komitəsinin sədri Rayner Stinnerin başçılıq etdiyi nümayəndə heyəti Azərbaycanda səfərdədir. Alt Komitənin sədri Rayner Stinner səfərin məqsədi ilə bağlı jurnalistlərə müsahibə vermişdir. O demişdir:
"Bu gün Azərbaycan təkcə geosiyasi mövqeyinə görə deyil, həm də başqa aspektlərdən dünya ölkələrinin diqqət mərkəzindədir.
Buradakı proseslərə nəzər saldıqda son illər Azərbaycanın çox sürətlə inkişaf edən ölkəyə çevrildiyinin şahidi oluruq. Bu nöqteyi-nəzərdən Azərbaycanın daha güclü bir dövlətə çevrilməsi bizi sevindirir. Azərbaycan həm NATO, həm də Avropa İttifaqı ilə çox güclü tərəfdaşa çevrilir. Səfərin məqsədi də Azərbaycanda gedən proseslərlə yaxından tanış olmaq, bəzi məsələlər ətrafında fikir mübadiləsi aparmaqdır". Ermənistan-Azərbaycan, Dağlıq Qarabağ münaqişəsinin həllinə toxunan komitə sədri ümid etdiyini bildirmişdir ki, Dağlıq Qarabağ münaqişəsinin həllində Madrid prinsipləri əsas götürülməklə sülh danışıqları davam etdiriləcəkdir. Münaqişə ATƏT-in Minsk qrupu çərçivəsində danışıqlar yolu ilə müsbət həll olunacaqdır.