Azərbaycanın xarici işlər naziri Elmar Məmmədyarov Nyu-Yorka səfəri çərçivəsində gürcüstanlı həmkarı Qriqol Vaşadze ilə görüşmüşdür.
Xarici İşlər Nazirliyinin mətbuat xidmətindən bildirmişlər ki, görüşdə ikitərəfli əlaqələrin vəziyyəti, ölkələrimiz arasında enerji sahəsində həyata keçirilən layihələr və bu istiqamətdə perspektivlər müzakirə olunmuşdur.
Bundan əlavə, görüşdə E.Məmmədyarovun Gürcüstana gözlənilən səfəri ətrafında fikir mübadiləsi aparılmışdır.
Azərbaycanın xarici siyasət idarəsinin rəhbəri, həmçinin Portuqaliyanın dövlət naziri, xarici işlər naziri Luis Filipe Marques Amado ilə görüşmüşdür. Görüşdə ikitərəfli, xüsusilə də iqtisadi əlaqələr müzakirə olunmuşdur.
E.Məmmədyarov Azərbaycanın və Portuqaliyanın iş adamlarının iştirakı ilə biznes forumun keçirilməsinin mümkünlüyü barədə danışmışdır.
L.Marques Amado Azərbaycanı Portuqaliya ictimaiyyətinə daha geniş təqdim etmək zəruriliyini vurğulamışdır.
Portuqaliyalı həmkarının Ermənistan-Azərbaycan, Dağlıq Qarabağ münaqişəsinə dair sualını cavablandıran E.Məmmədyarov problemin həlli ilə bağlı aparılan danışıqlar prosesi barədə ətraflı məlumat vermişdir.
Portuqaliyanın xarici işlər naziri azərbaycanlı həmkarının Azərbaycana səfər etmək dəvətini məmnunluqla qəbul edərək, cari il ərzində bunun gerçəkləşməsinin mümkünlüyünü qeyd etmişdir.
Görüşdə bir sıra qarşılıqlı maraq doğuran məsələlər ətrafında fikir mübadiləsi aparılmışdır.
AzərTAc{nl}