Sentyabrın 16-da Diasporla İş üzrə Dövlət Komitəsinin sədri Nazim İbrahimov Azərbaycanda səfərdə olan Latviyanın sabiq Prezidenti, BMT- nin baş katibinin xüsusi elçisi, Avropa İttifaqının Uzunmüddətli İnkişaf Proqramının həmsədri xanım Vayra Vike-Freyberqa ilə görüşmüşdür.
N.İbrahimov respublikamızın sürətli inkişafı, həyata keçirilən islahatlar, ölkəmizin regionda və dünyada möhkəmlənən mövqeyi, eləcə də Azərbaycan diasporunun yaranması, formalaşması, təşkilatlanması istiqamətində görülən işlər, onun fəaliyyəti barədə ətraflı məlumat vermişdir. O, Latviyadakı Azərbaycan diasporunun inkişaf perspektivləri, onların yerli cəmiyyətə inteqrasiyasından danışmışdır. Komitənin sədri ölkəmiz haqqında daha ətraflı məlumatların, eləcə də Ermənistan-Azərbaycan, Dağlıq Qarabağ münaqişəsi ilə bağlı əsl həqiqətlərin Latviya ictimaiyyətinə çatdırılmasında bu ölkədə yaşayan soydaşlarımızın yüksək fəallıq göstərmələrinin zəruriliyini qeyd etmişdir.
Xanım Vayra Vike-Freyberqa Azərbaycanda müşahidə etdiyi iqtisadi inkişafı, böyük dəyişiklikləri yüksək qiymətləndirmişdir.
Ermənistan-Azərbaycan, Dağlıq Qarabağ münaqişəsinə toxunan sabiq prezident, ölkəsinin məsələnin sülh yolu ilə Azərbaycanın ərazi bütövlüyü çərçivəsində həllinin tərəfdarı olduğunu vurğulamışdır.
Görüşdə Azərbaycan-Avropa İttifaqı münasibətlərinin cari vəziyyəti və perspektivləri müzakirə olunmuş, regional, qlobal və qarşılıqlı maraq doğuran digər məsələlər ətrafında fikir mübadiləsi aparılmışdır.
AzərTAc