Sentyabrın 13-də Azərbaycan Respublikasının Prezidenti yanında Strateji Araşdırmalar Mərkəzində "Azərbaycan-Qazaxıstan: ikitərəfli münasibətlər və qarşılıqlı regional əlaqələr" mövzusunda "dəyirmi masa" keçirilmişdir.
Tədbirdə çıxış edən Qazaxıstan Prezidenti yanında Strateji Araşdırmalar Mərkəzinin rəhbəri Bulat Soltanov Azərbaycan və Qazaxıstan arasındakı ticari, iqtisadi və siyasi əlaqələrin cari vəziyyətindən danışmışdır. B.Soltanov vurğulamışdır ki, "Azərbaycan ilə əlaqələrin inkişaf etdirilməsi Qazaxıstan üçün çox böyük əhəmiyyət kəsb edir".
Qazaxıstan rəsmisi dövlətlərimiz arasında ikitərəfli münasibətləri inkişaf etdirmək üçün böyük potensialın olduğunu qeyd etmiş, Xəzərin statusu ilə bağlı problemin həllinin vacibliyini vurğulamışdır.
Ermənistan-Azərbaycan, Dağlıq Qarabağ münaqişəsinin həllinə toxunan B.Soltanov demişdir: "Qazaxıstan ATƏT-in sədri kimi dondurulmuş münaqişələrin sülh, danışıqlar və qarşılıqlı kompromislər yolu ilə həlli üçün əlindən gələni edəcəkdir".
Daha sonra çıxış edən Qazaxıstanın ölkəmizdəki səfiri Serik Primbetov Azərbaycan-Qazaxıstan iqtisadi əməkdaşlığını yüksək qiymətləndirmiş, iki ölkə arasında ticarət dövriyyəsinin statistik göstəricilərini diqqətə çatdırmışdır.
Tədbirdə Azərbaycan Xarici İşlər Nazirliyinin məsul əməkdaşları, Azərbaycanda akkreditə olunmuş diplomatik nümayəndəliklərin təmsilçiləri, regional və beynəlxalq münasibətlər üzrə ekspertlər iştirak etmişlər.{nl}

AzərTAc