ATƏT-in Minsk qrupunun həmsədrləri İqor Popov (Rusiya), Bernard Fasye (Fransa) və Robert Bradke (ABŞ) yaxın həftələrdə göstərəcəkləri fəaliyyətin detallarını açıqlamışlar.
Birgə bəyanatda bildirilir ki, həmsədrlər ATƏT-in zirvə toplantısına qədərki müddətdə (1-2 dekabr) Dağlıq Qarabağ münaqişəsinin nizamlanması ilə əlaqədar xüsusilə fəal olmaq niyyətindədirlər. Bu məqsədlə də onlar sentyabrın 6-dan 10-dək Bakı, Yerevan və Dağlıq Qarabağda səfərdə olacaqlar.
Sentyabrın üçüncü həftəsini isə Vaşinqton və Nyu-Yorka səfər etməyi planlaşdıran həmsədrlər münaqişə tərəfləri ilə BMT-nin Baş Məclisi çərçivəsində iş aparacaqdır.
Sentyabrın sonu və oktyabrın əvvəlini əhatə edən dövrdə regiona geri dönən həmsədrlər Azərbaycanın Dağlıq Qarabağın ətrafında işğal olunmuş ərazilərində humanitar vəziyyəti müşahidə etmək üçün qiymətləndirici missiya həyata keçirəcəklər. 2005-ci ildə ATƏT-in faktaraşdırıcı missiyasından sonra regiona səfər edəcək həmin ilk beynəlxalq missiyanın tərkibində yüksək səviyyəli məsləhətçi və ekspertlər, eləcə də BMT-nin Qaçqınların İşi üzrə Ali Komissarlığının nümayəndələri və digər şəxslər təmsil olunacaqlar.
Səfərdən sonra həmsədrlər Vyanada ATƏT-in Minsk qrupuna üzv dövlətlərin təmsilçilərinə missiya ilə bağlı məlumat verəcək və Daimi Şuraya illik hesabat təqdim edəcəkdir.
Elgün NİFTƏLİYEV AzərTAc-ın xüsusi müxbiri
Vyana