Rusiya Federasiyasının Prezidenti Dmitri Medvedevin Bakıya səfərində onu müşayiət edən nümayəndə heyətinin tərkibində olan İnquşetiya Respublikasının Prezidenti Yunusbəy Yevkurov Azərbaycan jurnalistləri ilə görüşmüşdür.
İnquşetiya Prezidenti bildirmişdir ki, yaxın iki ayda Şimali Qafqaz respublikaları, o cümlədən, İnquşetiya ilə Azərbaycan arasında əməkdaşlıq haqqında saziş imzalanacaqdır. Həmin sənəd bütün sahələrdə, o cümlədən, sənaye, tikinti, kənd təsərrüfatı, mədəniyyət və turizm sahələrində əməkdaşlığı nəzərdə tutur.
Azərbaycana səfərinin tanışlıq xarakteri daşıdığını bildirən İnquşetiya Prezidenti demişdir: "Bir neçə il əvvəl Bakıda olmuşam. Məni ötən dövrdə burada baş vermiş dəyişikliklər heyrətləndirdi. İnkişaf sürətinə görə Avropa şəhərləri də paytaxtınızla müqayisəolunmazdır". Prezident İnquşetiyaya Azərbaycan sərmayələrinin yatırılması məsələsinin kompleks həll olunduğunu vurğulayaraq demişdir: "Bunun üçün hər şey hazırdır: hər cür şərait, sənaye meydançaları, infrastruktur yaradılmışdır. İş yerləri , o cümlədən, Azərbaycan diasporunun nümayəndələri üçün iş yerləri də olacaqdır".
Yunusbəy Yevkurov onu da bildirmişdir ki, İnquşetiya Respublikası Rusiyanın bütün regionlarında və MDB ölkələrində, o cümlədən, Bakıda nümayəndəliklərini açmağa hazırlaşır.
Sonda qonaq hamını müqəddəs Ramazan bayramı münasibətilə təbrik etmişdir.{nl}