Böyük Britaniya Leyborist Partiyasının ölkə parlamentdəki üzvü Jerri Sütklif Ermənistan-Azərbaycan, Dağlıq Qarabağ münaqişəsi ətrafında yaranmış duruma şərh verib.

Avropa Azərbaycan Cəmiyyətindən AzərTAc-a verilən məlumata görə Jerri Sütklif deyib: “Son günlər münaqişə zonasında Azərbaycan Silahlı Qüvvələrinin hərbçiləri həlak olub, azərbaycanlı mülki şəxslər isə qanunsuz olaraq həbs edilib. Azərbaycanın Ermənistan silahlı qüvvələri tərəfindən işğal olunmuş əraziləri geri qaytarılmalı və 1 milyondan çox azərbaycanlı məcburi köçkünə öz evlərinə dönmək üçün imkan yaradılmalıdır”.

O qeyd edib ki, Azərbaycanda səfərdə olduğu zaman məcburi köçkünlərin məskunlaşdığı düşərgələrə baş çəkib, onların şəraiti ilə yaxından tanış olub: “Azərbaycan hökumətinin məcburi köçkünlər üçün rahat yaşayış şəraiti yaratmasına baxmayaraq, yenə də bu insanların ən böyük arzusu öz dədə-baba torpaqlarına qayıtmaqdır. Ermənistan buna dair öz öhdəlikləri ilə bağlı ölçü götürməli və yol verdiyi beynəlxalq hüquq pozuntularına son qoymalıdır”.

Məlumat üçün bildirək ki, Jerri Sütklif sonuncu Leyborist hökumətində  davamlı və nəzərə çarpan siyasi karyera qurmağa müvəffəq olub. O, ədliyyə və idman naziri olmaqla yanaşı, Ticarət və Sənaye Departamentində yüksək vəzifələrdə çalışıb.