Azərbaycan gənclərinin böyük bir hissəsini öz ətrafında birləşdirən Yeni Azərbaycan Partiyasının Gənclər Birliyi mütəmadi olaraq müxtəlif layihələr həyata keçirir. YAP Gənclər Birliyinin  həyata keçirdiyi  növbəti tədbir Azərbaycan Respublikası Prezidenti yanında Gənclər Fondunun maliyyə dəstəyi ilə “Qəhrəmanlıq Salnaməsi” adlı layihənin açılışına həsr olunub. 

Tədbirdə Azərbaycan hərbçisi, Qarabağ  müharibəsi iştirakçısı, “Azərbaycan Bayrağı” ordeni kavaleri və kəşfiyyat-diversiya dəstəsinin komandiri İbad Hüseynov iştirak edib. Bu barədə AzərTAc-a YAP Gənclər Birliyindən xəbər verilib.

Əvvəlcə Azərbaycan Respublikasının dövlət himni səsləndirildi və YAP gəncləri Azərbaycanın ərazi bütövlüyü və suverenliyi uğrunda canlarını qurban vermiş Qarabağ şəhidlərinin əziz xatirəsini bir dəqiqəlik sükutla yad etdilər.

YAP Gənclər Birliyi ofisinin rəhbəri Əli Pənahov, layihə rəhbəri Vüsalə Hüseynova və İbad Hüseynov tədbir barədə geniş məlumat verdilər. Daha sonra gənclər öz sualları ilə diskussiyanı davam etdiriblər. Eləcə də tədbirdə qonaqlar - “Xüsusi təyinatlı” kitabının müəllifi Sahib Şirinov, 129 nömrəli məktəbin direktoru Samir Mehdizadə  və mətbuat xidmətinin rəhbəri Gülşən Behbudi çıxış etdilər.

Layihə çərçivəsində gənclərin yaradıcılıq nümunələri toplanaraq kitabça halına salınıb gənclərə paylanılacaq. Eyni zamanda Milli qəhrəmanlarımız haqqında hazırlanmış tanıtım videoçarxının təqdimatı edilib. Həmçinin qeyd olunub ki, sosial şəbəkələrdə həmin videoçarxların geniş yayımlanması həyata keçiriləcək.

Qeyd edək ki, İbad Hüseynov 1993-cü ilin iyunun 12-də məşhur erməni terrorçusu Monte Melkonyanın Xocavənddə başını kəsərək öldürmə iddiası ilə məşhurdur. Haqqında 2010-cu ildə “Əsgər” sənədli filmi

çəkilib.