Azərbaycan Dövlət Gömrük Komitəsi sədrinin müavini Əsgər Abdullayevin rəhbərlik etdiyi nümayəndə heyətinin İrana səfəri başa çatmışdır.
Gömrükçülərin Tehranda keçirdikləri görüşdə ölkələrimiz arasında gömrük keçidinin sadələşdirilməsi və gömrük nəzarətinin gücləndirilməsinə dair fikir mübadiləsi aparılmışdır. Qeyd edilmişdir ki, hər iki ölkənin gömrük orqanları "Gömrük prosedurlarının sadələşdirilməsi və uzlaşdırılması" haqqında Beynəlxalq Konvensiyaya qoşulmuşlar. Bu baxımdan ölkələrimizin müvafiq qurumları arasında işin səmərəliliyi üçün geniş perspektivlər mövcuddur.
Səfər çərçivəsində narkotik vasitələrin, psixotrop maddələrin və onların prekursorlarının qanunsuz dövriyyəsinin qarşısının alınması, qaçaqmalçılıq, digər gömrük hüquq pozuntuları ilə mübarizədə əməkdaşlığın səmərəsinin yüksəldilməsi üçün 2010-2012-ci illərə aid tədbirlər planı imzalanmışdır. Sənədi Azərbaycan Respublikası tərəfindən Azərbaycan Dövlət Gömrük Komitəsi sədrinin müavini Əsgər Abdullayev, İran İslam Respublikası adından Dövlət Gömrük İdarəsi sədrinin müavini Naser Cəhrumi imzalamışlar.

Sabir ŞAHTAXTI AzərTAc-ın xüsusi müxbiri Tehran