Aprelin 9-da Azərbaycanın xarici işlər naziri Elmar Məmmədyarov ölkəmizdə səfərdə olan Vyetnam Sosialist Respublikası Baş nazirinin müavini Hoang Çunng Hay ilə görüşmüşdür.
Ölkəmizdə səfərdə olmasından məmnunluğunu bildirən H.Ç.Hay tarixən xalqlarımız arasında sıx münasibətlərin olduğunu, Sovet İttifaqı dövründə Azərbaycanın müxtəlif ali təhsil müəssisələrində təhsil almış həmvətənlərinin hazırda Vyetnamın inkişafına verdikləri töhfəni xüsusilə vurğulamışdır. Vyetnamlı qonaq ölkələrimiz arasında əməkdaşlığın dərinləşdirilməsi üçün geniş potensialın olduğunu bildirmişdir.
Nazir E.Məmmədyarov bu cür səfərlərin ölkələrimiz arasında əlaqələrin intensivləşdirilməsinə təkan verdiyini, təhsil, neft-kimya, mədəniyyət və digər sahələrdə əməkdaşlığın genişləndirilməsi üçün geniş imkanlar yaratdığını demişdir.
Görüşün sonunda Azərbaycanın xarici işlər nazirinin müavini Xələf Xələfov və onun vyetnamlı həmkarı Nquen Kuok Kıonq "Azərbaycan Respublikası hökuməti və Vyetnam Sosialist Respublikasının hökuməti arasında diplomatik, xidməti və ya rəsmi pasportlara malik vətəndaşların vizasız gediş-gəlişi haqqında Saziş"i və "Azərbaycan Respublikasının Xarici İşlər Nazirliyi və Vyetnam Sosialist Respublikasının Xarici İşlər Nazirliyi arasında əməkdaşlıq Protokolu"nu imzalamışlar.
AzərTAc