Aprelin 9-da Azərbaycanın xarici işlər naziri Elmar Məmmədyarov ölkəmizdə rəsmi səfərdə olan Avropa İttifaqının (Aİ) genişləndirilməsi və Avropa qonşuluq siyasəti üzrə komissarı Ştefan Füle ilə görüşmüşdür.
Görüşdən sonra keçirilmiş birgə mətbuat konfransında nazir demişdir ki, görüşdə Azərbaycan ilə Avropa İttifaqı arasında əlaqələr, Ermənistan-Azərbaycan, Dağlıq Qarabağ münaqişəsi, "Şərq tərəfdaşlığı" Proqramı, energetika sahəsində əməkdaşlıq və digər məsələlər ətrafında fikir mübadiləsi aparılmışdır.
Bundan əlavə, komissara ölkəmizin iqtisadi inkişafı, həyata keçirilən demokratik quruculuq prosesi, Ermənistan-Azərbaycan, Dağlıq Qarabağ münaqişəsinin nizamlanmasına dair dövlətimizin mövqeyi barədə ətraflı məlumat verilmişdir.
Ş.Füle Azərbaycan ilə Aİ arasında siyasi dialoq, iqtisadi inkişaf, enerji təhlükəsizliyi, regional tərəfdaşlıq, demokratiya və insan hüquqları sahələrində əməkdaşlığı yüksək qiymətləndirmişdir.
Ölkəmizə səfərinin nəticələrini və keçirdiyi görüşləri səmərəli qiymətləndirən komissar bildirmişdir ki, Azərbaycan ilə Avropa İttifaqı arasında bir sıra mühüm layihələrin həyata keçirilməsi nəzərdə tutulmuşdur.
Bundan əlavə, komissar bəyan etmişdir ki, ATƏT-in Minsk qrupunun fəaliyyətini dəstəkləyən Avropa İttifaqı Ermənistan-Azərbaycan, Dağlıq Qarabağ münaqişəsinin sülh yolu ilə həllinin tərəfdarıdır.
AzərTAc{nl}