Azərbaycanın ərazi bütövlüyünün bərpası bölgədə sülhün təmin olunması baxımından xüsusi önəm daşıyır. Türkiyə-Ermənistan münasibətlərinin normallaşması istiqamətində atılan addımlar hələlik heç bir nəticə verməmişdir. Hazırda bu proses davam edir.
AzərTAc Türkiyə mətbuatına istinadla xəbər verir ki, bu sözləri Türkiyə Silahlı Qüvvələrinin yeni Baş Qərargah rəisi, ordu generalı İşık Koşaner Baş Qərargah rəisi postunun təhvil-təslim mərasimindəki çıxışında demişdir.
İşık Koşaner bildirmişdir ki, Cənubi Qafqazda ABŞ və NATO-nun öz təsir dairələrini genişləndirmək istiqamətində göstərdikləri səylərdən Rusiyanın keçirdiyi narahatlıq yeni problemlərin ortaya çıxmasına səbəb olacaqdır.
Yeni qərargah rəisi digər məsələlərlə də bağlı maraqlı açıqlamalar vermişdir. O bildirmişdir ki, terrorçulara sərbəstliyin verilməsi, onların bağışlanılması xalqda narahatlıq doğurur. Qanunların təmin etdiyi sərbəstlikdən sui-istifadə edən terrorçular artıq xalqın içində rahatca yaşaya bilirlər. Ona görə də təhlükəsizlik qüvvələri tərəfindən günahsız insanları terrorçulardan ayırmaq hər ötən gün bir az da çətinləşir.{nl}