Azərbaycanın Xarici İşlər Nazirliyinin mətbuat xidmətindən bildirmişlər ki, aprelin 9-da nazir Elmar Məmmədyarov Mavritaniya İslam Respublikasının xarici işlər naziri xanım Naha Mint Muknass ilə görüşmüşdür.
Ölkəmizdə ilk dəfə olmasından məmnunluğunu bildirən xanım N.M.Muknass Azərbaycan-Mavritaniya münasibətlərinin cari vəziyyətini yüksək qiymətləndirmiş, bütün sahələrdə əlaqələrin daha da inkişaf etdirilməsi üçün geniş potensialın olduğunu demişdir.
Nazir E.Məmmədyarov Azərbaycanın və Mavritaniyanın beynəlxalq təşkilatlar çərçivəsində müxtəlif məsələlərdə birgə mövqe nümayiş etdirməsinin vacibliyini vurğulamış, Ermənistan-Azərbaycan, Dağlıq Qarabağ münaqişəsi məsələsinin beynəlxalq təşkilatlarda, xüsusən də BMT-də müzakirəsi zamanı Azərbaycanın beynəlxalq hüququn normalarından və prinsiplərindən irəli gələn ədalətli mövqeyinin Mavritaniya tərəfindən dəstəklənməsinin zəruriliyini bildirmişdir.
E.Məmmədyarov Azərbaycan ilə Mavritaniya arasında iqtisadi, mədəni, humanitar, təhsil, səhiyyə və digər sahələrdə əməkdaşlığın inkişaf etdirilməsi üçün geniş imkanların olduğunu və bunun səmərəli istifadə edilməsinin münasibətlərimizin genişləndirilməsinə təkan verəcəyini vurğulamışdır.
Görüşün sonunda "Azərbaycan Respublikası hökuməti və Mavritaniya İslam Respublikası hökuməti arasında mədəniyyət sahəsində əməkdaşlıq üzrə Anlaşma Memorandumu" və "Azərbaycan Respublikasının Xarici İşlər Nazirliyi və Mavritaniya İslam Respublikasının Xarici İşlər və Əməkdaşlıq Nazirliyi arasında əməkdaşlıq haqqında Protokol" imzalanmışdır.
AzərTAc