Yeni Azərbaycan Partiyası (YAP) Ağdam rayon təşkilatının VIII konfransı keçirilmişdir.
Konfrans iştirakçıları əvvəlcə ümummilli lider Heydər Əliyevin Quzanlı qəsəbəsinin mərkəzindəki abidəsi önünə gül-çiçək düzmüş, xatirəsinə ehtiramlarını bildirmişlər.
YAP Ağdam rayon təşkilatının sədr əvəzi İsgəndər Quliyev qurumun fəaliyyəti haqqında hesabat məruzəsi ilə çıxış etmişdir. O bildirmişdir ki, rayon təşkilatı ötən konfransdan keçən müddət ərzində daha da təşkilatlanmış, ictimaiyyət arasında kütləviliyi artmış, rayonun ictimai-siyasi, mədəni və təsərrüfat həyatında aparıcı qüvvəyə çevrilmişdir. Partiya üzvlərinin sayı 4323 nəfərə çatmışdır. Onlardan 1300 nəfərini gənclər, 1612 nəfərini qadınlar təşkil edir.
Konfransda çıxış edən Ağdam Rayon İcra Hakimiyyətinin başçısı Nizami Sadıqov, YAP rayon təşkilatı qadınlar şurasının sədri Cəmilə Qasımova, təşkilatın gənclər birliyinin sədri Amil Cavadov, rayon təhsil şöbəsinin müdiri Elmira Şükürova təşkilatın fəaliyyətindən, rayonun ictimai-siyasi həyatındakı rolundan danışmışlar. Bildirilmişdir ki, ümummilli lider Heydər Əliyev siyasi kursunun layiqli davamçısı, dövlətimizin başçısı, Yeni Azərbaycan Partiyasının sədri İlham Əliyevin rəhbərliyi ilə ölkəmiz bütün sahələrdə dinamik inkişaf edir. Bu inkişaf hər yerdə olduğu kimi, Ağdam rayonunda da öz bəhrəsini verməkdədir. Rayonda geniş tikinti-quruculuq və abadlıq işləri aparılır, əhalinin sosial vəziyyəti yaxşılaşır.
Təşkilatın nəzarət-təftiş qrupunun hesabatı dinlənildikdən sonra təşkilati məsələlər müzakirə edilmiş, 31 nəfərdən ibarət rayon şurası və 5 nəfərdən ibarət nəzarət-təftiş qrupu seçilmişdir. Konfransda İsgəndər Quliyev YAP Ağdam rayon təşkilatının sədri seçilmişdir.
Milli Məclisin deputatı, "Azərbaycan" qəzetinin baş redaktoru Bəxtiyar Sadıqov və YAP Siyasi Şurasının üzvü, "İki Sahil" qəzetinin baş redaktoru Vüqar Rəhimzadə konfransda çıxış edərək Prezident İlham Əliyevin rəhbərliyi ilə əldə olunan uğurlardan, YAP-ın respublikanın həyatında oynadığı roldan danışmışlar.
Konfransda Yeni Azərbaycan Partiyasının sədri, Prezident İlham Əliyevə müraciət qəbul edilmişdir.{nl}