Naxçıvan Muxtar Respublikası Ali Məclisinin sədri Vasif Talıbov Braziliyanın Azərbaycandakı səfiri Paulo Antonio Pepeira Pinto ilə görüşmüşdür.
Ali Məclisin sədri 2009-cu ildə Azərbaycanda Braziliyanın səfirliyinin açılmasını ölkələrimiz arasında ikitərəfli münasibətlərin yaxşı göstəricisi olduğunu bildirmiş, muxtar respublikanın statusu, ərazisi, elm və təhsil müəssisələri barədə qonağa məlumat vermişdir.
Səfir Paulo Antonio Pepeira Pinto Naxçıvana səfərindən məmnunluğunu ifadə etmiş, ölkələrimiz arasında münasibətlərin müxtəlif istiqamətlərdə inkişafı üçün böyük potensial olduğunu, respublikamızda diplomatik fəaliyyəti müddətində əlaqələrimizin genişləndirilməsi, bu əlaqələrin Naxçıvan Muxtar Respublikasını da əhatə etməsi üçün səylərini əsirgəməyəcəyini vurğulamış, səmimi görüşə görə minnətdarlığını bildirmişdir.
Səfir ikigünlük tanışlıq səfərində Naxçıvan şəhərinin qədim tarixi abidələri və görməli yerləri ilə tanış olacaq, Heydər Əliyev, Naxçıvan Dövlət tarix və xalça muzeylərinə baxacaq, bir sıra görüşlər keçirəcəkdir.