Bu gün işğalçı Ermənistanla Türkiyənin sərhədlərinin açılması nə Türkiyənin, nə də Azərbaycanın maraqlarına cavab verir.
Bu sözləri Azərbaycan Respublikası Prezidenti Administrasiyasının ictimai-siyasi məsələlər şöbəsinin müdiri Əli Həsənov jurnalistlərə müsahibəsində demişdir.
Əli Həsənov bildirmişdir ki, bu, işğalçı rejimin əl-qolunun bir az da açılmasına, danışıqlarda qeyri-konstruktiv mövqeyə yuvarlanmasına səbəb olacaqdır. Bunu Türkiyə rəsmilərinin diqqətinə çatdırmışıq. Türkiyənin Prezidenti Abdullah Gül, Baş nazir Rəcəb Tayyib Ərdoğan və digər rəsmiləri dəfələrlə bəyan etmişlər ki, Ermənistan Azərbaycan torpaqlarının işğalına son qoymayınca iki ölkə arasındakı sərhədlər açılmayacaqdır.
Biz Türkiyə rəsmilərinin sözlərinə inanırıq və düşünürük ki, istər NATO-nun, istər ATƏT-in, istər Avropa Şurasının, istərsə də hansısa fövqəldövlətin tələbi olursa-olsun, ortaya qoyulmuş şərtlər yerinə yetirilməyənə qədər Türkiyə Ermənistan ilə sərhədləri açmayacaqdır.{nl}