Avqustun 25-də Türkdilli Ölkələrin Parlament Assambleyasının yeni yaradılmış internet saytının (www.turk-pa.org) təqdimat mərasimi keçirilmişdir. Tədbiri giriş sözü ilə açan TÜRKPA-nın baş katibi Ramil Həsənov Parlament Assambleyasının yaranmasından, qarşıdakı vəzifələrdən söhbət açdı. O dedi ki, Türkdilli Ölkələrin Parlament Assambleyası (TÜRKPA) 21 noyabr 2008-ci ildə Türkiyə Respublikasının İstanbul şəhərinin "Dolmabaxça Sarayı"nda Azərbaycan Respublikası, Qazaxıstan Respublikası, Qırğızıstan Respublikası və Türkiyə Respublikasının parlament rəhbərlərinin imzaladıqları sazişlə təsis olunmuşdur.
29 sentyabr 2009-cu ildə Azərbaycan Respublikasının paytaxtı Bakı şəhərində Türkdilli Ölkələrin Parlament Assambleyasının (TÜRKPA) I plenar sessiyası keçirilmişdir. Plenar sessiyada TÜRKPA-nın Reqlamenti, Katibliyin Əsasnaməsi və Bakı Bəyannaməsi, Katibliyin daimi əsasla Bakı şəhərində yerləşməsi haqqında qərar qəbul edilmişdir.
TÜRKPA Katibliyi Azərbaycan Respublikasının paytaxtı Bakı şəhərində yerləşən və beynəlxalq təşkilat statusuna malik olan qurumdur.
Türkdilli Ölkələrin Parlament Assambleyası müstəqillik, suverenlik, ərazi bütövlüyü və dövlət sərhədlərinin pozulmazlığı, hüquq bərabərliyi, bir-birinin daxili işlərinə qarışmamaq prinsiplərinə hörmət bəslənilməsi, zor işlətməkdən və zor işlədiləcəyi ilə hədələməkdən, iqtisadi və hər hansı digər təzyiq metodlarından imtina əsasında dövlətlərin siyasi və iqtisadi təhlükəsizliyinin möhkəmləndirilməsi, təbii ehtiyatlardan tam və səmərəli istifadə yolu ilə xalqların rifahının yüksəldilməsini əsas məqsəd olaraq seçmişdir. Milli iqtisadiyyatların dinamik inkişaf etdirilməsi, parlament diplomatiyası sahəsində yeni uğurlara imza atılması, region və digər beynəlxalq aləmin üzvü olan ölkələrin parlamentləri və digər beynəlxalq təşkilatlar ilə yeni əlaqələrin qurulması və mövcud əlaqələrin inkişaf etdirilməsi də əsas vəzifələrdəndir.
Qeyd edildi ki, yeni yaradılmış sayt 6 dildə fəaliyyət göstərəcək. Hələlik məlumatlar ingilis və Azərbaycan dillərində yayılır.
Sonda TÜRKPA ilə fəal əməkdaşlıq edən bir qrup jurnalist mükafatlandırıldı.{nl}

Əliqismət BƏDƏLOV, "Xalq qəzeti"