Mayın 7-də ABŞ Dövlət Departamentində keçirilən  brifinqdə Cənubi Çin dənizində Vyetnam və Çin arasında ərazi münaqişələri, Çinə məxsus balıqçı gəmilərinin Filippinin ərazi sularında  yaxalanması, Suriyada vətəndaş müharibəsi, Ukraynada vəziyyət, Nigeriyada məktəbli qızların girov götürülməsi və s. ilə bağlı suallara cavab verilmişdir.

ATƏT-in Minsk qrupunun amerikalı həmsədri Ceyms Uorlikin “Beynəlxalq Sülh uğrunda Karnegi Fondu”nda çıxışında ABŞ-ın Ermənistan-Azərbaycan münaqişəsinə dair siyasəti barədə bəyanatını xatırladan AzərTAc-ın Birləşmiş Ştatlardakı xüsusi müxbiri Yusif Babanlı belə bir sualla müraciət etmişdir: Həmin çıxışa  ABŞ-ın münaqişənin həllinə dair səylərini fəallaşdırması səbəb olubmu və yaxın gələcəkdə Amerikadan yeni təkliflər gözləmək olarmı? AzərTAc-ın xüsusi müxbiri belə bir məsələni də vurğulayaraq demişdir: “Kaliforniya ştatı Assambleyasının Qaydalar Komitəsi mayın 5-də erməni lobbisinin təzyiqi ilə ABŞ hökumətini Dağlıq Qarabağdakı qanunsuz rejimi tanımağa çağıran qanun layihəsini bəyənmişdir və ştatın qanunverici məclisinin üzvləri  mayın 8-də qanun layihəsinin qəbul edilməsinə səs verəcəklər”. Bu məsələnin ştatın qanunvericiliyinin sərəncamında olmasına baxmayaraq, ABŞ hökuməti həmin sənəd barəsində hansı mövqedən çıxış edir və Dövlət Departamenti bu məsələ ilə bağlı Kaliforniya ştatı Assambleyasının rəhbərliyinə müraciət edəcəkmi?

ABŞ Dövlət Departamentinin mətbuat katibi Cen Psaki birinci suala cavab verərək  qeyd etmişdir ki, ATƏT-in Minsk qrupunun amerikalı həmsədri Ceyms Uorlik “Beynəlxalq Sülh uğrunda Karnegi Fondu”ndakı çıxışında Birləşmiş Ştatların siyasətini və münaqişənin sülh yolu ilə həllinin əsasını təşkil edəcək hamı tərəfindən qəbul olunmuş prinsipləri şərh etmişdir. Cen Psaki demişdir: “Hesab etmirəm ki, Ceyms Uorlikin bu çıxışı yeni təkliflərin ortaya çıxdığını təsdiq edir. Həmin çıxışda bizim daimi mövqeyimiz yenidən səslənmiş və bu prosesə sadiqliyimiz ifadə olunmuşdur”.

Kaliforniya ştatı Assambleyasının nəzərdən keçirdiyi qanun layihəsinə dair məsələ ilə tanış olmadığını bildirən Cen Psaki onu aydınlaşdıracağını vəd etmişdir.

AzərTAc